Երևանին և Բաքվին առաջարկել են «3+3»-ն օգտագործել խաղաղության պայմանագիրն ավարտելու համար
Սերգեյ Լավրովը հիշեցրել է, որ կան նախագծեր, որոնք ստեղծվել են Ռուսաստանի, Հայաստանի և Ադրբեջանի եռակողմ աշխատանքի շրջանակում։
Երևանին և Բաքվին առաջարկվել է «3+3» հարթակն օգտագործել խաղաղության պայմանագրի ուղղությամբ կատարվող աշխատանքն ավարտելու համար։ Այս մասին նախարարների հանդիպումից հետո կայացած ասուլիսի ժամանակ հայտարարել է ՌԴ արտգործնախարար Սերգեյ Լավրովը։
«Մենք հիշեցրել ենք այն մշակումների ու նախածերի մասին, որոնք ստեղծվել են Ռուսաստանի, Հայաստանի և Ադրբեջանի եռակողմ աշխատանքի շրջանակում, ինչպես նախագահների, այնպես էլ արտաքին գործերի նախարարների ու փոխվարչապետների մակարդակով` և՛ հաղորդակցությունների ապաշրջափակման, և՛ սահմանազատման նախապատրաստման և մի շարք այլ թեմաների շուրջ», – ասել է Լավրովը:
Հիշեցնենք` «3+3» խորհրդատվական հարթակի առաջին նիստն անցկացվեց 2021 թվականի դեկտեմբերին։
Հարթակի երկրորդ նիստը (արտգործնախարարների մակարդակով) կայացավ 2023 թվականի հոկտեմբերին Իրանի մայրաքաղաք Թեհրանում։ Վրաստանը չմասնակցեց նաև երկրորդ նիստին։
«3+3» ձևաչափով 3-րդ նիստը կազմակերպվել է Ստամբուլում։ Վրաստանն այս անգամ ևս չի մասնակցում քննարկումներին։ Հանդիպմանը մասնակցում են Հայաստանի, Ռուսաստանի, Ադրբեջանի, Իրանի և Թուրքիայի արտգործնախարարները` Արարատ Միրզոյանը, Սերգեյ Լավրովը, Ջեյհուն Բայրամովը, Աբբաս Արաղչին և Հաքան Ֆիդանը։