Պերուում հանդիպել են ԱՄՆ-ի ու Ռուսաստանի նախագահները
Չնայած Մոսկվա-Վաշինգտոն հարաբերություններում առկա լարվածությանը, Պերուի մայրաքաղաքում գումարված ԱՓԵՔ-ի գագաթնաժողովին առնընթեր կայացել է ԱՄՆ-ի ու Ռուսաստանի նախագահների հանդիպումը:
Համաձայն ԻՏԱՌ-ՏԱՍՍ լրատվական գործակալության հաղորդման, Ռուսաստանի նախագահ Վլադիմիր Պուտինն ու նրա ամերիկացի պաշտոնակից Բարաք Օբաման, կիրակի օրը Պերուի մայրաքաղաք Լիմայում կայացած ճեպազույցի ժամանակ քննարկել են միջազգային որոշ հարցեր, այդ թվում` Սիրիայի ճգնաժամը:
Կրեմլի խոսնակ Դմիտրի Պեսկովն ընդգծել է. «Պուտինն ու Օբաման հանդիպման ժամանակ համաձայնել են մինչև ԱՄՆ-ի գործող վարչակազմի պաշտոնավարման ժամանակաշրջանի ավարտը շարունակել Սիրիայի ճգնաժամի կարգավորման ուղղությամբ երկու երկրի բանակցությունները»:
Պեսկովի ընդգծմամբ, Ուկրաինայի ճգնաժամի կարգավորման հարցում նկատվող լճացումը Ռուսաստանի և ԱՄՆ-ի նախագահների հանդիպման առանցքներից է եղել:
ԶԼՄ-ների հաղորդմամբ, Լիմայում կայացել է Ռուսաստանի ԱԳ նախարար Սերգեյ Լավրովի և ԱՄՆ պետքարտուղար Ջոն Քերիի հանդիպումը: