Սերբիայի նախագահը հայտարարել է, որ պատրաստ է անհրաժեշտության դեպքում Կոսովո զորք ուղարկել
Սերբիայի նախագահ Տոմիսլավ Նիկոլիչը հայտարարել է, որ պատրաստ է անհրաժեշտության դեպքում Կոսովո զորք ուղարկել՝ էթնիկ սերբերին պաշտպանելու համար, փոխանցում է BBC-ն:
Նա այս մասին հայտարարել է մեկ օր անց այն բանից հետո, երբ ձախողվել է Բելգրադից Կոսովոյի հյուսիս «Սերբիայի երկաթուղու» «Կոսովոն դա Սերբիան է» գրությամբ գնացքն ուղարկելու փորձը:
Սերբական Ռաշկա գյուղում գնացքը կանգնեցնելու կարգադրությունը կատարել է Սերբիայի վարչապետ Ալեքսանդր Վուչիչը: Նա ասել է, որ նման քայլի է դիմել «մարդկանց կյանքն ու ազատությունը պահպանելու, էլ ավելի մեծ հակամարտությունը կանխելու եւ ցույց տալու համար, որ մենք խաղաղություն ենք ցանկանում»:
Վուչիչը Կոսովոյի ուժայիններին մեղադրել է շարժակազմի ճանապարհին երկաթուղու պաստառն ականապատելու մեջ: Սերբիայի վարչապետը նաեւ հայտարարել է, որ Կոսովոյի իշխանությունները մտադիր էին կալանավորել շարժակազմի մեքենավարին եւ ուղեւորներին, չնայած, ըստ նրա, խոսքը «գնացքի, այլ ոչ թե տանկի մասին է»:
Կոսովոյի ոստիկանությունը այս մեղադրանքները հերքել է՝ ընդգծելով, որ ճանապարհը ստուգել է եւ այնտեղ պայթուցիկ չի հայտնաբերել:
News.am