افغانستان نمیبیا ته ستره ماتې ورکړه
د افغانستان د کرکټ ملي ټیم د روان ټي ټوینټي نړیوال کپ په روانو سیالیو کښې نن د نمیبیا لوبډلې ته په ستر توپیر سره ماتې ورکړه
د افغانستان د کرکټ ملي لوبډلې نن د شل اووریز نړیوال کپ په لړ کښې په خپلې دریمې سیالۍ کښې نمیبیا ته په ۶۲ منډو ماتې ورکړه.
په دغې سیالۍ کښې وړومبې بیټنګ یا توپ وهنه د افغانستان ټیم وکړه او محمد شهزاد ۴۵، حضرت الله ځاځي ۳۳ او محمد نبي ۳۲ منډې یا رنز جوړ کړل.
د افغانستان ټیم په ټاکلو شلو اورونو کښې د ۵ لوبغاړو په ورکولو سره ۱۶۰ رنز وکړل.
په ځواب کښې د نمیبیا ټیم په شلو اورونو کښې د ۹ لوبغاړو په سوځیدو سره یوازې ۹۸ منډې وکړې او داشان افغانستان دغه لوبه د ۶۲ منډو په ستر توپیر سره وګټله.
د افغانستان له خوا حامد حسن او نوین الحق ۳، ۳ او ګلبدین نایب ۲ کسان آوټ کړل.
افغانستان په روان ټي ټوینټي سیالیو کښې تراوسه ۳ میچونه کړي چې یو یې بایللی او دوه یې ګټلي دي.
