افغان طالبانو له فلسطین څخه خپل ملاتړ اعلان کړ
د افغان طالبانو د بهرنیو چارو وزارت وایي چې د فلسطین د غزې تړانګه کې وروستۍ پېښې له نژدې څاري.
زموږ د همکار فضل غني حقمل د خبر له مخې، د دغه وزارت لخوا په یوه خپره شوې خبرپاڼه کې راغلي، چې طالبان د فلسطین د خلکو د آزادۍ او د خپلو مقدساتو څخه هر ډول دفاع او مقاومت د دوی مشروع حق بولي.
سرچینې زیاته کړې، د افغانستان طالبان د فلسطین د خلکو د مشروع، تاریخی او قانوني حق څخه چې باید د فلسطین په تاريخي خاوره مستقل هېواد ولري خپل ملاتړ اعلانوي.
طالبانو له اسلامي هېوادونو، د اسلامي همکاريو له سازمان، نړېوالې ټولنې او په ځانګړي ډول له هغو هېوادونو څخه چې په سيمه کې اغېزه لري غوښتنه کوي چې د اسرائیلي اشغالګرو ځواکونو له خوا پر فلسطیني بېګناه ولس د تاوتريخوالي مخه ونیسي، او د فلسطين د قضیې د حل لپاره چې فلسطينيانو ته پکې خپل مشروع حق ورکړل شي، لاس پکار شي.
