په ایران کې افغان کډوالو ته بریښنایي تذکرې ورکول کېږي
په داسې حال کې چې ملګرو ملتونو ویلي چې ډېری افغانان د هویت اسناد نه لري، اوس افغان طالبانو ویلي چې په دې برخه کې اتباعو ته هم برېښنایي تذکرې صادرېږي.
د افغان طالبانو د احصایې ملي ادارې ویاند محمد حلیم رافع وایي چې په ایران او پاکستان کې د «برېښنایي تذکرو د وېش مرکز» جوړولو لپاره هڅې روانې دي.
په تېرو درېیو کلونو کې د افغانستان اتباعو لپاره ۹ میلیونه برېښنایي تذکرې (هوشمند کارتونه) صادر شوي دي. دا په داسې حال کې ده چې د ملګرو ملتونو د کډوالو چارو ادارې راپور ورکړی چې ډېری افغانان د هویت اسناد نه لري.
د برېښنایي تذکرو د وېش بهیر په ۲۰۱۷ کال کې د جمهوریت په نظام کې پیل شوی او تر اوسه د ۱۵ میلیونو څخه زیاتو افغانانو لپاره صادر شوي، چې ډېره برخه یې د افغان طالبانو په دوره کې ترسره شوې ده.
د ملګرو ملتونو د کډوالو چارو اداره وایي چې د هویت اسنادو نه لرل اتباع د مهمو خدمتونو ترلاسه کولو څخه محروموي، لکه د ځینو دندو غوښتنه، پاسپورټ یا د موټر چلولو جواز.
جګړې لامل شوي چې په افغانستان کې ډېر لومړني خدمتونه له ځنډ سره مخ شي، ډېری افغانان د هویت اسناد نه لري او په دې برخه کې له ډېرو ستونزو سره مخ دي.
