د عراق کردستان سیمې ته د ایران د ولسمشر د لومړي سفر پیغامونه او اهمیت:-
د ایران د اسلامي جمهوریت ولسمشر مسعود پزشکیان عراق ته د خپل سفر په دوهمه ورځ د عراق کردستان سیمې ته ورسید او د دغه سیمې مشر نیچروان بارزاني » یې هرکلی وکړ.
د ایران ولسمشر په تیرې چهارشنبې ورځ د یوه لوړرتبه سیاسي او د اقتصادي پلاوي په مشرۍ عراق ته ورغی او په بغداد هوايي ډګر کښې یې د لومړي وزیر لخوا هرکلی وشو.
د ایران د اسلامي جمهوریت ولسمشر مسعود پزشکیان د عراق له ولسمشر او لومړي وزیر سره جلا جلا کتنې او خبرې وکړې.
د ایران ولسمشر نن د عراق کردستان سیمې ته ورغی چې د ایران لومړنی لوړرتبه چارواکي او ولسمشر ووسي چې اربیل سیمې ته سفر کوي.
د ایران ولسمشر پزشکیان له اربیل وروسته د عراق په کردستان سیمه کښې سلیمانیه سیمې ته هم ورغی.
که څه هم د عراق اربیل سیمې ته د ایران د یوه ولسمشر لخوا لومړنی سفر د مسعود پزشکیان لخوا ترسره شو خو که چیرې د پخواني ولسمشر ابراهیم رئیسي هیلي کوپټر د روان میلادي کال د مي د میاشتې په اتلسمه نیټه نه نسکوریدلای ټاکل شوي وه چې هغه اوه ورځې وروسته د ایران لومړنی ولسمشر ووسي چې د عراق کردستان سیمې ته سفر وکړي.
د پزشکیان سفر یو ځل بیا د دې ښودنه کوي چې د ایران اسلامي جمهوریت د ګاونډي توب سیاست په جدي ډول په لومړیتوب کښې لري او هغه تعقیبوي.
د عراق کردستان سیمې ته د ایران د ولسمشر سفر په داسې شرایطو کښې وشو چې په تیرو دریو میاشتو کښې د کردستان سیمې مشر نیچروان بارزاني درې ځله تهران ته سفرونه راوکړل.
هغه د لومړي ځل لپاره د تاوتریخوالي د ختمولو په چوکاټ کښې ایران ته راغی.
ورپسې له مسرور بارزاني سره یوځاي تهران ته راغی او دا ځل د ایران د ولسمشر ابراهیم رئیسي د جنازې په مراسمو کښې د ګډون لپاره او دریم ځل هم د مسعود پزشکیان د ولسمشرۍ د لوړې په دستورو کښې د یوه میلمه په توګه ایران ته راغی.
د دغو ډيپلوماټیکو سفرونو تر ټولو مهم پیغام دا دی چې دواړه لوري دغه نتیجې ته رسیدلي دي چې ګډو سیاسي سرحدونو ، اړیکو او کلتوري ، ټولنیزو او د تاریخي زمینو چې له یوبل سره یې لري او دغه راز ګډو ګټو او ګواښونو ته په پام سره ښه خبره دا ده چې د اختلافاتو په مدیریت کولو سربیره د دوستۍ او د اړیکو د ژورتیا په مدار کښې حرکت وکړي.
په همدې لړ کښې د ایران د اسلامي جمهوریت ولسمشر مسعود پزشکیان په تیرې چهارشنبې ورځ له « رووداو» ټیلي ويژن سره په مرکه کښې وویل د عراق د کردستان سیمې او د ایران اړیکې همدا اوس ښې دي او باید د هغو د پیاوړي کولو لپاره هڅه وکړو.
د اړیکو د پراخولو لپاره او د دوستۍ په مدار کښې د حرکت کولو لپاره د ایران او د عراق د کردستان سیمې د ګروهنې یوه نښه امنیتي موافقه ده.
د هغه امنیتي موافقې پراساس چې دوه کاله مخکې د ایران او د عراق ترمینځ لاسلیک شوه ټولې ترهګرې او بیلتون غواړي ډلې باید د ایران سرحدونو ته نږدې خپل مرکزونه خالي کړي او هغوې بې وسلې شي.
د دغه امنیتي موافقې د اجرا په لړ کښې ځینو ترهګرو ډلو خپل مرکزونه خالي کړل.
له وړاندې څو ورځو راهسې او عراق ته د ایران د ولسمشر د سفر په درشل کښې هم د امنیتي موافقې د بلې برخې د اجرا په لړ کښې د «کومله» په شان نورې ترهګرې ډلې یې هم شاتګ کولو او د خپلو اوسنیو مرکزونو خالي کولو او کیمپونو ته د هغوې انتقالیدا ته مجبوره کړې.
اخري ټکی دا چې د عراق کردستان سیمې ته د ایران د ولسمشر مسعود پزشکیان سفر اهمیت لري خو له دغه سفر وروسته باید د تهران او د اربیل د اړیکو د مخالفانو د اقداماتو او د خوځښتونو په هکله هم ځیر ووسو.
بې شکه د عراق د کردستان سیمې لپاره په امنه او ارامه فضا کښې د اړیکو پراخول به هم زیاتې ګټې ولري او ځايي حکومت کولای شي د ایران د اسلامي جمهوریت له وړتیاو او ظرفیتونو ګټه پورته کړي.
