د ایران او روسیې ولسمشرانو د مهمو مسائلو په هکله سلامشورې وکړې
د ایران د اسلامي جمهوریت او روسیې ولسمشرانو د کاسپین سمندر د ساحلي هیوادونو د پنځمې سرمشریزې ترڅنګ د دوه اړخیزو، سیمه ایزو او نړیوالو مسائلو په هکله د نظر تبادله وکړه.
د اسلامي ایران ولسمشر حسن روحاني پرون د قزاقستان په آکتاؤ بندري ښار کښې د خزر یا کاسپين سمندر د څنډې د هیوادونو د مشرانو د پنځمې غونډې ترڅنګ د روسیې له ولسمشر ولادیمیر پوټین سره په ملاقات کښې، په مختلفو برخو کښې د تهران-ماسکو د ملګرتیاؤ او اړیکو د لازیاتې پراختیا په ضرورت او اهمیت ټینګار وکړ.
د ایران ولسمشر په کاسپین سمندر کښې د ایران او روسیې ګډې ملګرتیاوې د دواړو ولسونو په ګټه وبللې او ویې ویل: کاسپین سمندر باید د صلحې او دوستۍ د سمندر په توګه د ساحلي هیوادونو د لازیاتې دوستۍ، ملګرتیا او د اړیکو د پياوړتیا لپاره په یو عامل بدل شي.
ولسمشر روحاني زیاته کړه: د سیمه ایز امنیت او په سوریه کښې له داعش او ترهګرۍ سره د مبارزې په شمول په مختلفو سیمه ایزو او نړیوالو مسائلو کښې د ایران او روسیې دوه اړخیزې او څواړخیزې ملګرتیا په سیمه کښې مثبتې پایلې لرلې دي او دا ملګرتیا باید د ترهګرې تر بشپړې جرړې وتنې پورې دوام ولري.
په دغه کتنه کښې د روسیې ولسمشر ولادیمیر پوټین هم په بیلابیلو برخو کښې د روسیې او ایران د اړیکو پراختیا ته په اشارې سره ټینګار وکړ: ماسکو د دواړو لورو د خوښې وړ برخو او د ګډو ګټو په لړ کښې له تهران سره د اړیکو لازیاتې پراختیا ته چمتو ده.
د روسیې ولسمشر برجام یوه مهمه او نړیواله موافقه وبلله او ورڅخه د امریکې له یواړخیزې وتنې وروسته یې د ټولو لورو لخوا د دغې ایټمي موافقې د ساتنې او پیاوړتیا په لړ کښې د هلوځلو ضرورت ته په اشارې سره، د مختلفو سیمه ایزو او نړیوالو مسائلو د هواري په لړ کښې د دواړو هیوادونو د چارواکو په سلامشورو او ملګرتیا ټینګار وکړ.
