د پاکستان لومړي وزیر نن د مننې ورځ اعلان کړه
زمونږ خبریال راپور راکړي د پاکستان لومړي وزیر شهباز شریف نن د تشکر ورځ اعلان کړه چې د هندوستان پرضد بریالي پوځي عملیات ولمانځي.
هغه وویل پاکستان به نن د یوم تشکر یعني د مننې ورځ ولمانځي ځکه چې پاکستان هندوستان ته غاښ ماتونکی ځواب ورکړی او د هندوستان پرضد د پاکستان د «بنیان المرصوص» عملیات هم بریالي وو.
د مننې ورځ به د خدای پاک د تشکر او دغه راز د وسله والو ځواکونو د ښې روحیې او د ټول ملت د وحدت د ستایلو لپاره ولمانځل شي.
د پاکستان لومړي وزیر شهباز شریف وویل د بنیان المرصوص پوځي عملیاتو د دښمن تیریو ته اغیز شیندونکی او غاښ ماتونکی ځواب ورکړ او زیاته یې کړه پاکستان په هر محاذ کښې خپل بروالی وښود.
هغه د پاکستان له ملت او مذهبي متفکرانو وغوښتل چې په ټول هیواد کښې د خدای پاک د تشکر کولو لپاره لمانځونه وکړي او د شهید شویو کسانو لپاره دې هم لمانځونه وکړي.
