ایران نه بلکې امریکا د نړیوالو قوانینو خلاف ورزۍ کوي
زمونږ خبریال وايي د روسیې د بهرنیو چارو وزارت ویاندې میرمن ماریا زاخارووا بیګا ټینګار وکړ د نور سپوږمکۍ په توغولو کښې د ایران اقدام د ملګروملتونو د امنیت شورا د ۲۲۳۱ پریکړه لیک خلاف ورزۍ نه ده .
هغې جوته کړه امریکا په داسې حال کښې ایران د امنیت شورا د ۲۲۳۱ پریکړه لیک په خلاف ورزۍ کولو تورنوي چې په خپله واشنګټن په ځلونو نوموړی پریکړه لیک تر پښو لاندې کړی دی .
د روسیې د بهرنیو چارو دوزارت ویاندې میرمن ماریا زاخارووا وویل د ملګروملتونو د امنیت شورا ۲۲۳۱ پریکړه لیک او اټومي تړون ایران په فضايي چارو او فضا کښې له سوله ییز شتون څخه نه دی منع کړی .
هغې په دې خبرې ټینګار سره چې د نور سپوږمکۍ په توغولو کښې د ایران اقدام د اټومي پروګرام په ارتباط د ملګروملتونو د امنیت شورا له پریکړه لیکونو سره هیڅ تضاد نلري وویل د امریکا دغه ادعا چې وايي د ایران توغندي اټومي وسلې لیږدولی شي په کامل ډول بې اساسه ده .
دغه راز د ایران خارجه وزیر جواد ظریف هم وویل امریکا تهران د امنیت شورا د ۲۲۳۱ پریکړه لیک په خلاف ورزۍ کولو تورنوي دا په داسې حال کښې ده چې امریکا په کراتو د دغه پریکړه لیک خلاف ورزیانې کړي دي .
