د امریکا ولسمشر ټرمپ به خپله ماتي ونه مني
ایرنا خبري اژانس وايي په ملګروملتونو او امریکا کښې د فرانسې پخواني سفیر ژرارډ اروډ( Gérard Araud) د امریکا د ولسمشرۍ په انتخاباتو کښې د ډیموکراټ ګوند د کاندید جوبایډن په بریالیتوب د ډاډ په څرګندولو سره ټينګار وکړ اوسنی ولسمشر ډونالډ ټرمپ به په انتخاباتو کښې خپله ماتي ونه مني .
هغه وویل د امریکا د ولسمشرۍ په انتخاباتو کښې د ډیموکراټ ګوند کاندید جوبایډن په نهایت کښې بریالی کیږي خو اوسنی ولسمشر ټرمپ به په خپلې ماتي اعتراف ونکړي .
د امریکا د ولسمشرۍ په انتخاباتو کښې د ډیموکراټ ګوند کاندید جوبایډن تراوسه د الیکټرول کالج دوه سوه څلورشپیته (۲۶۴) رایې ګټلي دي او ولسمشر ټرمپ هم د الیکټرول کالج دوه سوه څوارلس (۲۱۴) رایې لاس ته راوړي دي .
د امریکا د ولسمشرۍ د انتخاباتو په سیسټم کښې ولسمشر د الیکټرول کالج د غړیو په رایو سره چې شمیر یې پینځه سوه اته دیرش (۵۳۸) دی انتخابیږي .
په دغه بهیر کښې د امریکا د ولسمشرۍ د انتخاباتو هر کاندید باید د بریالیتوب لپاره د الیکټرول کالج د دوه سوه اویا (۲۷۰) غړیو د رایو ترلاسه کولو ته ضرورت لري .
د امریکا د ډیموکراټ ګوند کاندید جوبایډن او د ریپبلیکن ګوند کاندید ډونالډ ټرمپ د ولسمشرۍ د انتخاباتو د رایو د شمیرلو په هکله د نظر اختلاف لري .
