تورنجنرال حیدري: د جګړې ډګر د ایران وسلهوال ځواکونه چلوي
پارس ټوډی - د ایران د وسلهوالو ځواکونو د لوی درستیز مرستیال په دې خبرې سره چې موږ له هغه امریکا سره جګړه کوو چې ډېر هېوادونه یې له نوم اخیستلو څخه هم وېره لري، وویل: د جګړې د ډګر چلوونکي د ایران وسلهوال ځواکونه دي.
د پارستودي د راپور له مخې، چې د صداوسیما خبري اژانس په حواله خپور شوی، د ایران د وسلهوالو ځواکونو د لوی درستیز مرستیال، امیر جنرال«کیومرث حیدري»، په خپلو څرګندونو کې د دې خبرې په ټینګار چې د ایران اسلامي جمهوریت وسلهوال ځواکونه د جګړې په ډګر کې بریالي دي، وویل: نن د ایران وسلهوال ځواکونه له شک پرته د جګړې د ډګر بریالي دي، د بریا له هغه تعریف سره چې زه یې لرم، که مدافع وکولای شي د دې مخه ونیسي چې بریدګر په ټاکلي وخت او ټاکلي ځای کې خپلو له مخکې ټاکل شویو موخو ته ورسېږي، نو مدافع بریالی دی او د دې علمي تعریف له مخې، موږ نن د جګړې د ډګر بریالي یو.
امیر تورنجنرال حیدري د جګړې له پیل څخه د دښمن موخو ته په اشاره کې وویل: دښمن له خپلو ټولو هڅو، ۴۷ کالونو ګواښونو او چمتووالي سره راغی او په دروند ځواک یې برید وکړ، څو د خپل ادعا له مخې، په لنډ وخت کې د ایران د اسلامي جمهوریت نظام بدل کړي؛ خو دا یوه بېځایه هیله وه.
هغه په دې خبرې سره چې د ایران اسلامي جمهوریت وسلهوال ځواکونه نن د جګړې د ډګر چلوونکي دي، ټینګار وکړ: نن د جګړې د ډګر چلوونکي د ایران وسلهوال ځواکونه دي. نن موږ د جګړې ډګر چلوو؛ په دې معنا چې هغه ستراتیژیک پلانونه چې د جګړې په ډګر کې یې پلي کوو، د دښمن د انفعال لامل شوي دي.
د ایران د وسلهوالو ځواکونو د لوی درستیز مرستیال زیاته کړه: هغه دښمن چې د نظام د نسکورولو هیله یې لرله، نن دښمن د جګړې په ډګر کې په دفاعي او غبرګوني حالت کې عمل کوي؛ یعنې که کوم اقدام ترسره کوي، زموږ د اقدام په غبرګون کې یې ترسره کوي.
امیر تورنجنرال حیدري په جګړه کې د ایران د اسلامي جمهوریت د بریا پر اغېزمنو عواملو په تشریح کولو سره وویل: موږ له هغه امریکا سره جګړه کوو چې ډېر هېوادونه ترې وېره لري او حتی په اسانۍ سره یې نوم هم نه شي اخیستلای، څه چې له هغې سره په جګړه کې ښکېل شي. د امریکا تر شا صهیونیستي رژیم او د سیمې ځینې هېوادونه ولاړ دي او موږ په دې شرایطو کې بریا ترلاسه کړې ده.
تورنجنرال حیدري په وروستیو بریاوو کې د خلکو رول ته په اشاره کې وویل: د بریاوو اصلي ستنه د ایران خلک دي؛ هغه خلک چې په میدان کې حاضر دي، ستړي شوي نه دي او، لکه چې ویل کېږي، ستړیا یې هم ستړې کړې ده.
