Al-Sudani në takim me Erdogan: Iraku nuk do të tolerojë shkeljen e sovranitetit të tij
Kryeministri irakian Mohammed Shia Al Sudani i ka thënë presidentit turk Rexhep Tajip Erdogan se Iraku nuk do të tolerojë asnjë shkelje të integritetit të tij territorial në një referencë të qartë ndaj sulmeve sporadike të Turqisë ndaj vendstrehimeve të dyshuara të militantëve kurdë në Irakun verior dhe veriperëndimor.
Sudani i bëri komentet të hënën në një konferencë të përbashkët shtypi pas një takimi me Erdogan në Bagdad.
Ai tha se Iraku gjithashtu do të parandalojë çdo përdorim të territorit të tij për sulme ndaj vendeve të tjera.
Referenca e Kryeministrit irakian për sulmet e Turqisë në tokën irakiane erdhi disa orë pasi presidenti irakian Abdul Latif Rashid bëri komente të ngjashme në një takim me Erdoganin, ku ai kërkoi respekt për sovranitetin dhe sigurinë e Irakut.
Raportet e mediave irakiane thanë se Sudani dhe Erdogan kishin diskutuar sigurinë së bashku me një sërë çështjesh kryesore ekonomike dhe tregtare, duke përfshirë ndërtimin e një projekti rrugor prej 17 miliardë dollarësh nga jugu në veri të Irakut, si dhe çështjet që lidhen me pjesën e Irakut nga uji i lumenjve Tigër dhe Eufrat që burojnë nga Turqia.
Erdogan tha në konferencën për shtyp me Sudanin se vendi i tij është i vendosur të rrisë marrëdhëniet me Irakun në një mënyrë që garanton të drejtat e vendit arab si një vend fqinj.
Të dy palët përsëritën gjithashtu dënimin e tyre për sulmin e vazhdueshëm izraelit kundër palestinezëve në Gaza.
