Kina kërkon hetim për sulmin në Pakistan që vrau 5 shtetas kinezë
Kina ka dënuar një sulm me bombë në Pakistanin veriperëndimor që vrau pesë shtetas kinezë që punonin në një kantier të madh të digës Dasu.
Policia tha të martën se të paktën pesë shtetas kinezë dhe shoferi i tyre vendas u vranë kur një sulmues përplasi makinën e tij të mbushur me eksploziv në kolonën e tyre.
Sulmi ndodhi në autostradën kryesore që lidh Pakistanin me Kinën.
Inxhinierët kinezë po udhëtonin drejt impiantit të digës Dasu që është një digë gjigante dhe është sulmuar edhe në të kaluarën.
Ambasada kineze në Islamabad lëshoi një deklaratë në lidhje me shpërthimin.
“Ambasada dhe konsullatat kineze në Pakistan e dënojnë fuqishëm këtë akt terrorist dhe shprehin ngushëllime të thella për viktimat e të dy vendeve dhe shprehin ngushëllimet e sinqerta për familjet e viktimave”, thuhet në deklaratë.
Ambasada kineze gjithashtu u kërkoi autoriteteve pakistaneze të "marrin masa praktike dhe efektive për të mbrojtur sigurinë e qytetarëve, institucioneve dhe projekteve kineze për të parandaluar që incidente të tilla të përsëriten".
Ministria e jashtme e Pakistanit tha se jeta dhe siguria e shtetasve kinezë në Pakistan ishte e rëndësisë thelbësore.
