Kikao cha Tehran: Nchi zinazosafirisha gesi kwa wingi duniani zasisitiza umoja

Washiriki katika mkutano wa ishirini na sita wa nchi zinazozalisha gesi kwa wingi duniani wamemaliza kikao cha Tehran kwa kutoa tamko kuhusu umuhimu wa umoja na mshikamano kati ya nchi wanachama.

Mkutano wa 26 wa kimataifa wa mawaziri wa nchi zinazozalisha gesi kwa wingi duniani (GECF) umefanyika Tehran na kuhudhuriwa na mawaziri wa nishati na viongozi wa ngazi za juu kutoka nchi wanachama ikiwa ni pamoja na Algeria, Bolivia, Misri, Guinea ya Ikweta, Iran, Libya, Nigeria, Qatar, Russia, Trinidad na Tobago, Umoja wa Falme za Kiarabu na Venezuela, pamoja na nchi waangalizi kama vile Jamhuri ya Azerbaijan, Iraq, Mauritania, Msumbiji na Senegal. Taarifa ya mwisho imesema: Ushirikiano wa kimataifa ni muhimu katika kukabiliana na changamoto za usalama, utulivu na uimara wa nishati.

Nchi zilizoshiriki katika mkutano huo pia zimesisitiza jukumu kuu la gesi asilia katika kufanikisha malengo ya maendeleo endelevu ya Umoja wa Mataifa, hasa katika kumaliza njaa na kuhakikisha upatikanaji wa nishati duniani kwa njia iliyopangwa, ya haki, jumuishi, inayofaa kiuchumi na inayolenga nchi ambayo kila mtu aweze kunufaika nayo.

Nchi zinazozalisha gesi kwa wingi duniani pia zimeeleza wasiwasi wao mkubwa kuhusu kuongezeka kwa mvutano katika eneo la Asia Magharibi na mashambulizi ya makusudi dhidi ya Jamhuri ya Kiislamu ya Iran, na kusisitiza kwamba mvutano huu sio tu unaleta hatari kwa utulivu wa eneo hilo na amani, bali pia unavuruga usalama wa nishati duniani kwa hatari kubwa.

Taarifa hiyo imebaini kuwa: "Yanayofanyika katika ardhi za Palestina zinazokaliwa kwa mabavu yanakiuka sheria za kimataifa kwa mtazamo wa kanuni za kutofanya shambulio na marufuku ya kuambatanisha kwa nguvu."