Uzinduzi wa Mafunzo ya Akili Mnemba kwa wanafunzi milioni moja Iran

Msaidizi wa Naibu wa Rais wa Iran katika Masuala ya Sayansi ametangaza rasmi uzinduzi wa mpango wa kufundisha Akili Mnemba (Artificial Intelligence) kwa wanafunzi milioni moja nchini humo.

Mojtaba Alizadeh, msaidizi wa Naibu wa Rais wa Sayansi, Teknolojia na Uchumi wa Maarifa ya Iran, amesema kuwa mchakato wa mafunzo ya Akili Mnemba umeanza kwa ajili ya wadau wote wenye nia katika teknolojia hiyo. Ameongeza kuwa makundi yote ya jamii, hususan wanafunzi na wapenzi wa teknolojia, wanaweza kutumia jukwaa hili la elimu bila malipo kujifunza masuala muhimu yanayohusiana na teknolojia ya Akili Mnemba.

Alizadeh amesema kuwa lengo kuu la mpango huo ni kuongeza uelewa wa umma na uwezo wa kitaifa katika nyanja ya Akili Mnemba. Hatua ya kwanza ya utekelezaji wa mpango huu tayari imeanzishwa kwa ushirikiano kati ya Ofisi ya Naibu wa Rais wa Sayansi na Teknolojia na Wizara ya Elimu.

Alizadeh amesisitiza kuwa mpango huu umeundwa kwa njia ya kuvutia na ya kimkakati ili kuwafundisha wanafunzi milioni moja wenye umri kati ya miaka 7 hadi 15, kwa njia za kinadharia na kivitendo.

Akili Mnemba, mojawapo ya nyanja zinazokua kwa kasi zaidi za teknolojia ambayo inabadilisha kwa msingi vipengele vingi vya maisha ya leo, imepiga hatua kubwa nchini Iran, nchi yenye fursa na changamoto za kipekee.

Moja ya sifa kuu za mfumo wa ikolojia ya Akili Mnemba nchini Iran ni ushirikiano unaoongezeka kati ya vyuo vikuu na sekta ya viwanda. Ushirikiano huu husaidia kampuni mpya na startups kunufaika na maarifa na utafiti wa kisayansi na kutoa bidhaa na huduma mpya kwa kutumia Akili Mnemba.