HAMAS: Mwafaka umefikiwa kuhusu Wapalestina 620 ambao Israel ilichelewesha kuwaachia huru

Hamas imeeleza katika taarifa kwamba, ujumbe wa harakati hiyo ukiongozwa na kiongozi wake mwandamizi Khalil al-Hayya, jana Jumanne ulikutana na maafisa wa Misri kujadili utekelezaji wa makubaliano ya kusitisha mapigano na kubadilishana mateka pamoja na maandalizi ya awamu inayofuata ya mazungumzo.

 

Harakati hiyo ya ukombozi wa Palestina imetilia mkazo haja ya kufuatwa na kutekelezwa kikamilifu na kwa usahihi masharti yote ya makubaliano hayo.

 

Hamas imeongeza kuwa, suluhisho limepatikana ili kuhakikisha wafungwa Wapalestina wanaachiliwa huru wakati mmoja na kukabidhiwa utawala wa Kizayuni mabaki ya miili ya watu wake, kama ilivyoafikiwa hapo kabla chini ya awamu ya kwanza ya makubaliano ya kusitisha vita na kubadilishana mateka, na kwamba mbali na wafungwa, Wapalestina wanawake na watoto waliowekwa kizuizini, nao pia wataachiwa huru.

 

Hayo yanajiri katika hali ambayo, afisa mmoja wa utawala wa Kizayuni wa Israel alithibitisha jana Jumanne kuwa, maelewano yamefikiwa na Hamas kutatua mvutano wa chelewesha kuwaachilia huru wafungwa Wapalestina.

 

Afisa huyo ambaye hakutajwa jina lake, ameiambia chaneli ya 13 Israel: "upatanishi wa Misri umefaulu...Makubaliano yamefikiwa kutatua suala la kucheleweshwa kuachiliwa kwa wafungwa wa Kipalestina".

"Iwapo hakutatokea mabadiliko ya dakika za mwisho, mabaki ya mateka wanne Wasirael yatarejeshwa Jumatano usiku bila ya hafla rasmi, na wafungwa wa Kipalestina wataachiliwa hatua kwa hatua kutoka kwenye jela za Israel," ameongeza afisa huyo wa Kizayuni.

Awamu ya kwanza ya makubaliano ya kusitisha vita huko Ghaza ilianza Januari 19, ikihusisha hatua tatu za utekelezaji, ambazo kila moja ilipangiwa kuchukua muda wa siku 42, huku mazungumzo ya awamu inayofuata yakitakiwa kuanza kabla ya kukamilika awamu ya sasa.

Ikiwa ni sehemu ya awamu hii, ambayo inahusisha kuachiliwa mateka 33 Waisrael, wakijumuishwa walio hai na waliokufa, makundi ya Muqawama ya Palestina tayari yamewaachia huru mateka 25 walio hai na miili ya mateka wanne waliofariki katika nyakati saba tofauti.

Utawala wa Kizayuni wa Israel kwa upande wake, hadi sasa umechelewesha kuachiliwa huru wafungwa wapatao 620 wa Kipalestina, licha ya Hamas kutekeleza kikamilifu ahadi zake chini ya makubaliano hayo.../