İron İslam Respublika, bə Yəməni Əlhodidə Səudiyə pesoxtə bıə koalsiya həmləon məhkumış kardə.
İroni xarıcə vəzarətxanə sıxənəvot bə Yəməni Əlhodidə porti Səudiyə pesoxtə bıə koalsiya avyasiyə iyən dıyoku həmləon məhkum və ım kişvərədə insoniyə vəzyəti çimiku vey bıhronin beyku niqəronion elanış karde.
İroni xarıcə vəzarətxanə sıxənəvot Bəhram Ğasımi zinə ruji ijən bə İroni vindemon təkid kardə ki Yəməni bohran de hərbi roon həl nibəbe və bə Yəmən təcovuzkoron bəbe ım təcovuzi sə kən.
Ğasımi əlovəş kardə: ım cinoyəton Yəmənədə canqi vəy qəteyro kamə umidon ki siyasi cəhdon vasitə əncom bey holədəy məhvış karde və vəzyəti çımiku vey mırəkkəb bey bois bəbe.
1 manq bənav Səudiyə rejim və İ Bıə Ərəbon Əmirəti hərbion, Əlhodidə porti işğal karde xoto tojə əməliyaton bino kardən və hol ım ki ım port bə Yəməni mıhosirə bıə millət humanitarə koməkon rosniyero vey muhimmə roe.
Ərəbiston de İ Bıə Ərəbon Əmirəti, Amerkə və sionist rejim iyən bəzi co mıttəhıdon 2015-nə sori Martiku bə Yəmən hərbi təcovuzi bino kardən ijən ım kişvəri zəmin, osmon və dıyoku mıhosirə kardən.
Yəmənədə Ərəbiston, İ Bıə Ərəbon Əmirəti və de əvon mıttəhid bıə məmləkəton cinoyəton xoto detosə bə ısət 14 həzo nəfəriku vey yəmənıj kışte, çandə 10 həzo nəfər zəxmin və çand milyon avarə bıən.
