Zərif: ətomiyə saziş be Amerkə huzuri bəştə həyot dəvom dodə.

İroni xarıci vəzir de işorə bə Amerkə noxşəti bə sanksiya vabəstə bey xoto təkidış karde: ətomiyə saziş be Amerkə huzuri həm bəştə həyot dəvom dodə.

Muhəmməd Cəvad Zərif de CNN kanali mısohibə votışe: Amerkə dəvardə dıvlət həm bəştə vədəon əməl karde iyən sanksiyaon ləğv karde əvəzi, veyni bə sanksiyaon ijən oqardoniye təkidəkəy.

Zərif bə Amerkə tərəfo bə İroni əleyh 1953-nə sori Avquestə manqi icra bıə hərbi peqardımon işorəş karde və votışe: ım kişvər ijən İronədə de həmonə hərbi peqardımoni bəpeştə təşkil bıə dıvləti həmkari karde fikədəy və hol ım ki jıqoni və əvon bəpe ım pərişonə hanqiku oğo bıbun.

İroni xarıci vəzir de Amerkə muzakirə karde rəddış karde və təsdiğış ka: ətomiyə təvafuğ bo Amerkə qıləy imtivon bə əmmo Amerkə vey rohət ım muğavilə ləğvış karde çən ijən bo muzakirə bə Amerkə xatircəm mande əbe ni.

Zərif çı Avropa təziğon jiədə Trampi nəzəri əvəzbey imkon zınəş be və votışe: ımruj çı Amerkə vey nezə mıttəhidon bə İroni əleyh tojə sanksiyaon vədə muğavimət kardedən əmmo Vaşenqton ijən Avropa vədə yolə şəxəti kardedə.

İroni xarıci vəzir bə İroni milləti əleyh Amerkə dıvləti dəvardə 40 sornə fişaron işorə və əlovəş karde: İroni millət çı Amerkə fişaron vədə muğavimət bəkan və ım fişar iyən təziğ əvoni təslim ni bəkarde.