İroni ehdəmonon kam karde 3 minə mərhələ hozzo bıə.

İroni xarıci vəzarətxonə sıxənəvot bə İroni ətomiyə ehdəmonon kam bey 3 minə mərhələ plani kəşe işorəş karde və votışe: əqə diplomatik cəhdon bə nəticə bırəso ım ehdəmonon ijən obqarde.

Seyed Əbbas Musəvi ım mıvzo barədə votışe: bə diplomatiya iyən votımonon doe mıhləti kənoədə iyən ətomiyə sazışi mandə kişvəron bə ehdəmonon əməl karde çərçivədə İron bə ım muğavilə əsos ıştə ehdəmonon kamkarde 3 minə baxşi ome rujonədə icra bəkay.

Əv İron və Fransə prezidenton miyono telefoniyə rabitə iyən Zərifi bə Fransə səfər karde həmonə diplomatik cəhdon nımonə zınəş be və votışe: həmmə diplomatik hərəkəton kənoədə İron 3 minə ğədəmi peqəte xoto hozzo bıə və əqə muzakirəon be nəticə be hukmən ıştə ehdəmonon ijən kam bəkay.

Musəvi 3 minə ğədəmi dəvardə mərhələonku vey zumand zınəş be ta İroni həx və qiədə bıə ehdəmonon həmohənq bıbun.

İroni xarıci vəzir Muhəmməd Cəvad Zərif həm zinə elanış karde ki əqə detosə Sentiyabri 5 ətomiyə sazışi barədə Avropa tərəfo lozimə koon əncom nıbun, İron ıştə 3 minə ğədəmi elan bəkay; əv votışe: İroni ğərol çımiku bənav və de məktobi bə Avropa elan bıə.