Bo ətomiyə muğavilə oqəteyro bəpe muzakirə bıbu; Avropa bəpe İroni nati həvate qarantiya bıkə.

İroni xarıci vəzir bo ətomiyə muğavilə oqəteyro bə diplomatik səy-cəhdon idomə təkid və əlovış karde: İron bə ətomiyə sazışi əsos ehdəmonon kam karde 4 minə mərhələş icra karde.

Bə İrna raporti əsos, Muhəmməd Cəvad Zərif işorəş karde ki İroni ım ğərol çımiku bənav elan bıə be.

İroni xarıci vəzir votışe: Avropa be əmələ siyasəton iyən Amerkə be ğanunə rəftori vədə İron bə ətomiyə muğavilə əsos ıştə ğədəmon pe bəqəte əmmo ijən muzakirə əbzariku həm istifodəkəy.

Tojədən İroni xarıci vəziri muavin Seyed Əbbas İrağçi həm bə Spotink aqentiyəti votışe: Amerkədə ome səçın ətomiyə sazışədə İroni ğərolon təyinəkəy ni.

Əv votışe: Tehroni nəzəku bəpe Avropa İroni nati həvate iyən çəy puli bankiyə sistemon tərəfo doe qarantiyaəkə bıbu ta ətomiyə muğavilədə İroni mənafe təmin bıbun.

Seyed Əbbas İrağçi təkidış karde ki qıləy beynəl xalğ muğavilə oqəte əvəzi muhimmə məsələ İroni milləti mənafe hifz kardeye.