Bə İslomi yeqanə xanımi şəhodətə ruji sorəqardışi xoto İron matəmədəy.
Xıdo Rəsul(s) qiramiyə kinə Həzrəte Fatimə Zəhra(s) şəhodəti sorqərdışədə İroni muxtəlif vırəon matəmədəy.
Imruj Hicri Ğəməri Cəmadiul Sani manqi 3 iyən Yanvarə manqi 17-nə ruje, təğvimədə ımruj Xıdo Rəsul(s) qiramiyə kinə iyən dınyo şiəyon 1-nə İmom Həzrəte Əli(ə) qiramiyə həyot həmro şəhodəti sorqərdış ğeyd bıə.
Bə Həzrəte Zəhra(s) şəhodəti sorəqrdışi xoto hasornə bərnoməon de Əhli-Beyti(ə) aşiğon əzəmətinə işteraki həmməy Huseyniyə-məçidonədə bərpo əbi əmo ımsor Koronavirus bois bıə ki səhiyyəvi porotokolon rioyəti xoto mərosimon məxsus təin bıə vırəonədə bərpo bıbu.
Əmmo İroni kuçə-xiyobononədə bıə siyohə sima və obraz çok çoki Həzrəte Zəhra(s) şəhodətə rujon matəmi bə yod vardeydə.
Çandə məxsus mərosimon həm virtual iyən onlayn surəti bərpo bey holədəy.
Imruj həmçenin İroni Tehron, Fars, Şərği Azərbaycan və Cənubi Xorasan ostanonədə bıə 19 qılə şəhronədə 8 sornə muğəddəsə mudafiə cəryonədə 29 qılə tojə peydo bıə şəhidon pokə bədən həm de səhiyyəvi prinsipon rioyəti təşi bıdə.
