Məhərrəm,Huseyni manq-1
Məhərrəm,Huseyni manq-1
Məhərrəmmə manqi əzodorəti fərhənq,boəmə çandə həzo dərs iyən mesajon bə ərməğon vardəşe.pəyğombəri(s) Əhli-Beyti(s) de bə Huseyni əzodorəti mərosimon bərpo kardey çə həzrəti bərnoməşon çe mərdumi vəhdəti məhvərışon ğərol doə iyən de milləti bo Huseyni əzodorəti mərosimon bərpo kardeyro təşviğ kardey iyən bəsirət iyən aqahəti icod kardey,çe ğıvvon pərokəndə iyən volo-volo bıey vəy bıqəton.joqo ki,ımruj çə həzrəti şəhodəti əyyam iyən rujonədə çandə milyon inson de mıxtəlifə təbəğə,irği iyən məzhəbi farğon bəico,har qıləy vırədə bo ə həzrəti əzodorəti kardero ğıyom kardedən iyən çe Huseyni pərçəmi qırdo cəm beydən.
Dini rəhbəron rəvoyətonədə omə bo Əba Əbdullah İmom Huseyni(ə) iyən bo ə həzrəti əshobon Kərbəloədə bıə məzlumiyyəti bəmey ziyodə əcr iyən mıkofot nəzədə qətey bıə. ın bəçəy xotoye ki,ın bəmey de co bəmeyon tafutine.ım bəmey çe ocizəti iyən dəmandey nışonə ni,bəlkəm çe izzət iyən səbarzəti əloməte.ım bəmey 1400 sornə qıləy sivilizasiyə iyən mədəniyyəti ğabiliyyəti dəstəqi nışon doydə ki,çəy jimon ofəyə şuon torıxi de etat-petati pur bı quzərqo iyən dəvardəcoyədə bə bəşəri roş nışon doə.
İmom Sadıği(ə)hamyəşe:”Bo Xıdo bandəon həmmə koonədə fəryod kəşey iyən bəmey nopəsəndə koye.ğərəz bo Huseyn ibn Əli(ə) fəryod kəşey iyən bəmey.zira bın barədə bəmə kəson bə qıləy uxrəvi səvobi dast pəydo bəkardeyn”.
Huseyni əzodoron de İmom Huseyn(ə) iyən çə həzrəti bəfodorə əshobon əzodorəti mərosimonədə iştiroki,deçəvon rufi şəxsiyyət iyən əzəməti oşno beydən və əvoni komilə insonon zıneydən ki,çe səbr,bəfo,istiğomət iyən ıştə coniku dıvardey sıfətonışon heste və çəvonku har qıləyni çe çokətiyon ulqu iyən usvən.həmməysə muhimmə çi həm,əzodoron bo ə həzrəton məzlumiyyət iyən mısibəton bə yod dənoeyro nıştedən,bəmeydən iyən de ın tərıği ıştə bəvon nisbətədə bıə məlumoti de atifi iyən hissi rabitə ğoym kardedən...
