Məhərrəm,Huseyni manq-4
Məhərrəm,Huseyni manq-4
De Həzrət İmom Huseyni(ə) jimoni səbki oşnoəti,həyğətədə bənə qıləy səfinə iyən kəştiye ki,qıləy zəmon səy kardedəmon bənə ə həzrəti jimonkəmon,çe həxı de botıli miyono bıə marzi bızınəmon iyən bəy rioyətkəmon,həyğətədə quya nicoti kəşti suvar bıəmon ki,xilos bəbemon.de ın tərtibi bın dınyoədə de səbarzəti jimon bəkardemon və bə orom iyən həyğiyə hərəbaxtəti bərəsemon iyən və axırətədə həm bə poydor,sabit iyən əslə jimoni dast pəydo bəkardemon.həmməysə əsil iyən muhimmə nuktə ki,çe həmmə çokə insonon jimonədə min cumlə çe İmom Huseyni(ə) jimonədə mışohidə beydə, hidoyət iyən bə həxı səmt dəvəti mevzuye.ım qıləy məsuliyyəte ki,hiç qıləy zəmonədə tərk bıəni iyən çəmə həmmə rəhbəron çe Odəmiku(ə) tosə İslomi pəyğombəri(s) xanedani zəmoni bəy rioyət kardəşone və ıştə jimoni usul iyən prinsipışon bəçəy əsos ğoym kardəşone.həmonə buzurquvarə odəmon həm ıştən həxə royədə hərəkət kardəşone iyən həmən çəvon jimoni əsliyə norohətçəti mərdumi çe xorafot və botıliku xilos kardey bıə.jəqo ki,çe İslomi pəyğombəri(s) bənav co qılə pəyğombəron həm bəy nisbətədə qıləy təəhhudışon bıə.İmom Huseyn(ə) həm hejo həmonə həxə məsir iyən royədə hərəkət kardedəbe.əmmo çə həzrəti jimonədə muhimmə nuktə,çə həzrəti ğıyomi məsələy.çunki, çə həzrəti zəmonədə çe camiyə yolon iyən səyvonon həm inhirofə royədə ğərolışon qətəbe və Xıdo din çe xətər iyən təhlukə mə`rəzədə be.de ın tərtibi İmom Huseyni(ə) bo çe məhfəti məsir iyən royədə hərəkət kardə dini xilosiro ğıyomış karde iyən hətto ıştə, ıştə xıyzoni iyən ıştə həmməyə çokə duston conış bo dini nicotiro fidoş karde.
Həlbəttə bəpe dığğə kardey bıbu ki,ə həzrət hejo ıştə koy sıftədə bə şımşi dastış nığande. bəlkəm,çandə kərə və hətto Kərbəlo məydonədə həm ki,dışmeni əvış mıhosirəş kardəbe,bə Xıdo itoət iyən çe qıno və xətoku pərhiz kardey həxədə muhimmə mevzu iyən mətləbonış bəyon karde.
