Məhərrəm,Huseyni manq-6
Məhərrəm,Huseyni manq-6
İmom Huseyn(ə) bə qıləy komilə mərıfət iyən barzə irfoni soyb be.ə həzrəti çe Xıdo mığobilədə qıləy roziyəti məğam iyən mıtləğə təslimış hestebe.İmom Huseyni(ə) pokə zohirış hestebe və qıləy məsumə imom be.ə həzrət dayima zikr kardedəbe və bəşəvnəy de ibodəti məşğul beydəbe.İmom Huseyni(ə) həmməysə muhimmə xıslət ki,Məhərrəmə manqi rujonədə iyən əzodorəti zəmonədə bəpe bəy qıləy xususi dığğət kardey bıbu,çə həzrəti deştə pərvərdıqori bıə xolisonə irtibot iyən bandəçəti be.Hoci şeyx Əbbos Ğomi ıştə Məfatihul-Cinan kitobədə Ərəfə dıvo sıftədə jıqo nıvışteydə:İmom Huseyn(ə) Ərəfə ruji əsrə vaxti de xuzu iyən xuşu bə Kəbə səmt mande,ıştə dastonış ıştə dimi vədəş qəte iyən ın dıvoş hande:qıləy dırozə dıvo ki,çe Xıdoşınosi iyən insonşınosi dərson klas və sinife.
Çe Ərəfə dıvo de mehtəvo iyən mazqi pur bıə iborəonədə çe İmom Huseyni(ə) xolisonə bandəçəti bə cuş omey vey məlume.cumləon anədə aşığonəy ki,quya və jıqo bızın İmom Huseyn(ə) ğərəz Xıdo co kəsi vindedəni iyən mınocotədə qıləy ləzzət vindedə ki,hiç qıləy çiyədə boəy hosil nibəbe.həzrət Məhdi(s) ıştə buzurquvarə cədd İmom Huseyni(ə) rəftori tevsifədə Mığəddəsə Nahiyə ziyorətədə jıqo hamyedə:”tı pəyğombəri(s) fərzənd iyən Ğıroni təbyinəkəş.tı çe umməti yar və himoyədor iyən İlahi itoəti royədə cəhdı karde,əhd və peymonı hifzı karde,botıl iyən nifoği roy miyoniku barde,tı həmonə şəxsiş ki,ruku iyən səjdə hestebe.bənə dınyoku kuç kardə kəsi tı, dınyoədə zohid biş”.
İmom Huseyn(ə) nəyinki,ıştə şəhodəti ləzonədə “Fi səbilillahi”(Xıdo royədə)zikri bə zıvon vardedəbe,bəlkəm hejo sıb iyən şamqo ın dıvo zumzumə kardedəbe və bəştə zıvon cari kardedəbe......
