Əqə Amerkə ətomiyə təvafuğiku xaric bıbu İron ıştə ətomiyə fəaliyəton inkişofi bino bəkay.

İroni xarıci vəzir de Amerkə Əlmanitor kanali musahibə karde təsdiğış kardə: əqə Amerkə ətomiyə təvafuğiku xaric bıbu İroni vədə vey ciddiyə ğərol sulhin ətomiyə fəaliyəton ijən de surəti bino kardeye.

Bə Fars aqentiyəti raporti əsos Muhəmməd Cəvad Zərif təkidış kardə ki Amerkə hiç faxt ətomiyə təvafuğədə bəştə əhd-peymon əməl kardəş ni iyən fəğət Amerkə milli mənafe çərçivədə hərəkət kardə.

İroni xarıci vəzir bə dəvardə 15 manqi mıddətədə Amerkə siyast iyən Funqsiya çı ətomiyə təvafuği iğtisodiyə mənafeku İroni məhrum karde işorə kardə iyən votışe: ım təvafuğiku Amerkə xaric bey İroni iğtisodədə hiç təsirış ni.

Zərif bo ətomiyə təvafuğədə mandeyro çı Amerkə prezidenti vindemoni cəlb karde xoto bə Almaniya iyən Fransə rəsmi ali şəxson və səhihə vindemon iyən cəhd işorəş kardə və votışe: ım qıləy səhvə siyasəte boçi ki əvon əqə çı Avropa iyən ıştə kişvəron mənafe fikədə bıbun bəbe Trampi rozi bıkən ki ətomiyə təvafuği çərçivədə bəştə qiədə bıə məsuliyəton çok çoki əməl bıkuy.

Amerkə prezident Donald Tramp hejo ətomiyə təvafuği çərçivədə ozv bıə kişvəron vindemoni əks ım muğavilə qıləy dəheştin təvafuğ elan kardə ki bəbe əvəz bıbu və hol ım ki umum iştimaiyət çı Amerkə prezidenti ım deşmənçiyə vindemoni nosəhih hisob kardən.

Amerkə Jıqonə befoydə cəhd qıləy şərayetədə əncom bıdə ki ətomiyə beynəl xalğiyə təşkilat və Amerkə informasiya təşkilaton 10 kərə ətomiyə təvafuği çərçivədə çı İroni dırıstə fəaliyəton təsdiğ kardən.