Qeneral Suleymani terrori barədə reaksiyaon dəvom kardedə.

Pakistani prezident Arif Ələvi zinə İroni tojə səfiri vindemonədə votışe: Amerkə tərəfo qeneral Ğasım Suleymani terror və şəhadət məhkum kardə nine və əmə ım məsələ və hadisə bə İron sə bə səloməti dodəmon.

İjən de Pakistani məzhəbi şəxsiyəton və ruhaniyon iştiroki, İslam Abadədə bə qeneral Şəhid Suleymani və çəy həmrəzmon ehtırom karde mərasim bərpo be.

Pakistani sərhəd məntəğəon iyən ıştaton vəzir Şəhriyar Xan Afəridi həm qeneral Ğasım Suleymani terrori anti bəşəriyət hərəkət və ko bə hisobış varde ki İrağədə de Amerkə xəbisə plani əncom be.

Xəbə ome Tırkiyə xarıci vəzir Molod Çavoş Oğlo həm zinə Bəğdadədə de İraği xarıci vəzir xəbə iclosi cərəyonədə İroni məşhurə qeneral Ğasım Suleymani terrori, Asiya ğərb məntəğədə stajış nıbıə bıhrani icodəkə amil zınəş be.

Əmmo zinə həmzəman İrağiku muxtəlif cəmaət və şəhrvandon Bəğdadədə Amerkə cinoyət və terori əncom bıə vırədə cəm bin və bə Şəhid Ğasım Suleymani və Əbo Məhdi Əlmohəndesi ehtırom kardışone.

Suriyə Lazığiyədə həm çand həzo nəfər bə şəhid Ğasım Suleymani ehtırom karde xoto qırd bemon bərpo iyən Amerkə terroristiyə cinoyəti məhkum kardışone.

İslami inğilabi nığo doə Ğuds ğıvvə fərmondə qeneral Suleymani cumə yanvari 3 nə ruji bə İraği rəsmiyə şəxson dəvəti əsosi bə ım məmləkət səfərış kardə be və  Həşsuı-şəbi muavin Əbuməhdi Əlmohəndes və 8 nəfər ki dəy həmro bin Amerkə mutəcavez və  terroristiyə ğıvvon bə İraği Bəğdadı aeroporti nezi hucumədə bə şəhodət rəsin.