Şiyə dınyo yolə alimon-156
Şiyə dınyo yolə alimon-156
Hicri-Ğəməri çordəminə əsrədə jiyə Şiyə yolə alimonku qıləyni həm de Mirzaye Şirazi nomi məşhur bıə Məhəmməd Həsən Şirazi bıə.əv Hicri-Ğəməri 1230-ə sorədə Cəmadiyul-Əvvəli miyonə rujonədə İslomi əziz-qramiyə peyğombəri(s) nəvəonku qıləyni kədə ki,çı Şirozi alimonku be və xoşxəttotət iyən kaliqraf be,çəy kədə qıləy zoə fərzənd bə dınyo ome ki.çəy nomışon Məhəmməd Həsən noşone.seyd Məhəmməd Həsən fəğət se sorış hestebe ki,ıştə pış çı dasto doe və çı yətiməti qardı-xok bəçəy çehrə nışte.çəy pı bəpeştə çəy day Məhəmməd Ələşrəf çəy ğəyyumətiş bəştə ehdəş peqəte və çoko ki,vindeşe Məhəmməd Həsəni qıləy məxsusə huş və istedodış heste,ço sinnədə əvış de Kərimə-Ğıron iyən farsi zıvonu omutey məşğulış karde. fəğət dı sor dəkəşe ki,əv farsi ədəbiyyot iyən mığəddimə dərsonış komilə surətədə omuteşe.əv şəş sinniku ıştə vaxtış bo ərəbi ədəbiyyoti təlimiro sərfış karde və fəğət həşt sinnış hestebe ki, de xitobə fənnon iyən dini maarifon elmon omutey koy məşğul be və bənə fiğh,usul iyən kəlomi elmon təhsili koyədə ziyodə səyonış karde.hejo həmonə həşt sorədə be ki,deməkə ki,kamə sinnış hestebe,bəştə ustodu tələbi əsos,bo iminə kərə çı minbəriku bəpe şe və de vayizəti iyən moyizə koy məşğul be.
Seyd Məhəmməd Həsən nevcıvonəti zəmonədə çı Şirazi dini elmon yolə ustodon palu “Şərhul-Lum`ə” kitob ki,çı Şiyə həmməyusə fiğhi mənbəon muhimmə qıləyniye,təlimış vinde.əv yonzə sinnış hestebe ki,bə ustodəti dərəcə rəse və elmiyyə hovzədə de tədrisi koy məşğul be.de ın holi ım çın istedoninə cıvoni roy bino bıə zəmon be.əv bo boştə elmi ğudrəti əyoni və elon kardero binoş karde bo şəhər iyən diyoron seyro-səfə karde və koyədə bə ziyodə əzob-əziyyəton tovış varde.əv peşo bə İsfəhoni elmiyyə hovzə ome və əyo bənə seyd Həsən Bidabadi bıə alimi palu bəştə təhsili dəvomış doe və vist sinni bənav bə iştihodi dərəcə və məğami rəse.əmmo hətto çəy bə iştihodi dərəcə rəsey ko həm bəçəy elmi omutey koy mane nıbe......
Seyd Məhəmməd Həsən ıştə 29 sinnədə deştə jimoni həmro iyən fərzəndon bə Nəcəfı-Əşrəfi elmiyyə hovzə səmt hərəkətış karde və holın ki,deməkə ki,çəy iştihodiku 9 sor dəvardedəbe, əmmo ijən ın yolə alim deştə təvazukorəti bənə de Sahibul-Cəvahiri nomi məşhur bıə Məhəmməd Həsən Nəcəfi,Həsən Kaşiful-Ğita iyən şeyx Murtəzo Ənsari bıə yolə alimon dərsi məclisonədə huzur iyən iştirokış hestebe.de ın tərtibi ım xoş əxloğ iyən cıvonə tələbə çı Şiyə dıqlə alim iyən mərcəye-təğlidi yəni de Sahibul-Cəvahiri nomi məşhur bıə Məhəmməd Həsən Nəcəfi iyən şeyx Murtəzo Ənsari nəzdədə elmonış dərk karde və çın yolə alimon feyziku bəhrəş barde.şeyx Murtəzo Ənsari dərson məclis cə cələsonədə be ki,əv de Əfağanıstanıjə anti-imperiyalistə mıcohidə tələbə bıə seyd Cəmaluddin Əsədəabadi oşno be və ım oşnoəti boəy peşonə soronədə ziyodə səməronış be.
