Şiyə dınyo yolə alimon-179
Şiyə dınyo yolə alimon-179
Şiiə yolə alimon
Şiyə ali-ğədr iyən yolə alimonku co qıləyni ayətullah Cahanqirxan Ğəşğayi bıə.Əv Hicri-Ğəməri 1243-ə yəni milodi 1828-ə sori İsfəhoni ətrofədə bıə ğəşğay dıjdə ili toyfəku qıləy zoə fərzənd bə dınyo ome ki,bəy Cahanqir nomışon noe.çəy pı Muhəmmədxan çı Dərəşuri nahiyə əmir iyən yolonku və çəy mo həm Simirem xanzodəonku be.Cahanqir bənə qıləy sərvətinə xanzodə jimonış karde.deməkə ki,sayir hırdənon deştə il və toyfə kuç kardedəbin iyən məcbur bin ki,sori mıxtəlifə fəslonədə çı səfə iyən vırəbəvırə kardey saxtiyon deştə coni bıhıron.əv ıştə inə kənoyədə mandedəbe və oroməti tərcrubə kardedəbe.
Cahanqir bənə sayir Ğəşğay hırdəon vey rə asb romey iyən tiyğandeyış omute.əmmo çun ki,əv qıləy səvodin iyən zırənqə zoə be,çəy pı çəy elmi təhsili mığəddiməş hozzı karde.əv bo elmi təhsili mığəddimə omuteyro bə qıləy məktəb iyən mədrəsə nışe.bəlkəm boəy mellim qəteydəbe və həmonə mellim bəçəvon kə omeydəbe.çımonsə əlovə Cahanqir vey bə musiği rəğbətış hestebe.əve əv musiği omutey iyən çandə nev məhəlli iyən lokal musiği omuteyədə ziyodə səy kardedəbe və de tosə çıl sori çəy həmməysə muhimmə məşğələonku qıləy tar jıeye be….
Cahanqirxan Ğəşğayi çıl soriyətiyədə be ki,təsadufi deştə zəmonə yolə alimonku qıləyni ki,çı şeer iyən şayirəti əhl be,oşno be.macəra jıqo be ki,Cahan0qirxan boştə tari təmir kardero bə İsfəhon oməbe və vıjorədə həm nəveydəbe ki,ıştə tari təmirko.bın zəmon çı rujiqori məşhurə şəxs ki,de Humaye-Şirozi nomi məşhur bıə Məhəmməd Rıza Ğolixan çəy roysə ğərolış qəte.
Humaye-Şirozi çı Şirozi yolə xıyzon iyən mənsəb soybonku be və çandə sor əbi ki,bo elm iyən zıney kəsb kardero bə İsfəhon oməbe.Humaye-Şirozi iyən Cahanqirxan de tari təmiri vavunə de iyande həmkəlom bin və həmonə bın kırtə mıddətədə Humaye-Şirozi fame iyən dərəse ki,çəy həmsehbət çanədə istedodin iyən elminə şəxse.qıləy istedod ki,deməkə ki,çəy umriku çıl sor dəvardə,əmmo hənuz kifoyət ğədərədə zizəş kardəni və perəsəni.Humaye-Şirozi Cahanqirxanış təşviğ kardeşe ki,bə İsfəhoni Sədr mədrəsə bışo və ıştə elm iyən ağliku bo elmi omuteyro oko bıdo.həmonə hodisə səbəb beydə ki,Cahanqirxan ki,hejo çı hırdənətiku bo elmi omuteyro qıləy şevğ iyən həvəsış hestebe,ıştə sabiğ jimonış vodoşe və çı İsfəhoni Sədr mədrəsədə de elmi omutey koy məşğul be…..
Ğədimul-Əyyam iyən kanə zəmoniku adət ım be ki,mədrəsəonədə iyən elmiyyə hovzəonədə çı usul iyən fiğhiku əlovə ki,çı nəğli elmonkuye.yəni de hədison iyən de Kərimə-Ğıroni ayəon tərıği roy vositə hosil beydə),bənə riyaziyyat,heyət,tibb iyən nucum elmonku iborət bıə ağli elmon həm tədris beydəbe.şiyə alimon həmişə bə ağl iyən əğlaniyyoti dığğət kardedəbin.çıro ki,İslom dayima ıştə tərəfdoron bo təfəkkur iyən tədəbbıriro təşviğ kardedə və əvoni ağliku oko nıdoə holədə qıləy ko ğəbul kardeyku oqəteydə.
