Ghana : Nana Akufo-Addo Ya yi Rantsuwar Kama Aiki

Sabon shugaban Ghana Nana Akufo-Addo Ya Kama Aiki a Yau Asabar, bayan da yayi rantsuwar kama aikin a bikin da aka shirya a Accra babban birnin kasar.

Shi dai Nana Akufo Addo ya yi nasara ne bisa shugaban kasar John Dramani Mahama a zaben kasar da aka gudanar cikin watan jiya.

Baki da dama ne daga kasashen duniya ciki har da shugabanni kasashen Afrika 11 suka halarci bikin.

Nasara da aka samu a zaben kasar ta Ghana inda shugaban mai barin gado yasha kaye tare da mika mulki cikin ruwan sanyi ya nunawa duniya yadda tsarin demukuradiyya ya samu gindin zama a kasar ta Ghana.