Mahukuntan Masar Sun Kama Wani Masanin Harkar Tattalin Arzikin Kasar

'Yan sandan Masar sun kama wani masanin harkar tattalin arziki kuma marubuci kan zargin sukar mahukuntan kasar kan gazawa a fagen inganta harkar tattalin arzikin kasar.

Rundunar 'yan sandan Masar a jiya Lahadi ta yi awungaba da Abdul-Khaliq Faruq marubuci kuma masanin harkar tattalin arziki kan zarginsa da yin maganganu marassa tushe kan halin tattalin arzikin kasar.

Kafin rundunar 'yan sandar Masar ta kama Abdul-Khaliq Faruq ta dauki matakin hana buga wani littafin da ya wallafa kan harkar tattalin arziki da ya kira littafin da cewa: "Shin Masar tabbas matalauciyar kasa ce?".