Tsagerun Yahudawan Sahayoniyya Sun Kutsa Cikin Masallacin Qudus

Wasu gungun tsagerun Yahudawan Sahayoniyya sun kutsa cikin Masallacin Qudus tare da rera taken muzanta addinin Musulunci.

Rahotonni sun bayyana cewa: Wasu gungun tsagerun Yahudawan Sahayoniyya da suke samun cikakkiyar kariya daga sojojin gwamnatin Haramtacciyar kasar Isra'ila a jiya Asabar sun kutsa cikin Masallacin Qudus tare da gudanar da taron gangami a harabarsa suna rera taken cin mutunci ga addinin Musulunci.

Har ila yau sojojin Haramtacciyar kasar Isra'ila sun rufe babbar hanyar Halimah da ke arewacin garin Janin a gabar yammacin Kogin Jordan har na tsawon kwanaki biyu bisa da'awar cewa: Yahudawan Sahayoniyya zasu gudanar da bukukuwan addininsu a wadannan kwanakin lamarin da zai takura wa rayuwar Palasdinawa mazauna wannan yankin.