Sojojin Haramtacciyar Kasar Isra'ila Sun Kai Farmaki Kan Yankunan Palasdinawa

Sojojin gwamnatin Haramtacciyar kasar Isra'ila sun kai farmaki kan yankunan Palasdinawa da suke Gabar Yammacin Kogin Jordan, inda suka fuskanci maida martani daga matasan Palasdinawan yankunan.

Majiyar watsa labaran Palasdinawa ta sanar da cewa: Daga daren jiya Litinin zuwa wayewar garin yau Talata sojojin gwamnatin haramtacciyar kasar Isra'ila sun kai farmaki kan yankunan Palasdinawa da suke Gabar Yammacin Kogin Jordan, inda suke shiga cikin gidajen Palasdinawa suna lalata musu kayayyakin gida.

Matasan Palasdinawan yankunan sun dauki matakin maida martani ta hanyar jifar sojojin da duwatsu, inda sojojin haramtacciyar kasar ta Isra'ila suka jikkata Palasdinawa masu yawa tare da yin awungaba da wasu 14 na daban.

A cikin watannin baya-bayan nan sojojin gwamnatin haramtacciyar kasar Isra'ila suna yawaita kai samame yankunan Palasdinawa da suke Gabar Yammacin Kogin Jordan da birnin Qudus tare da cin zarafin Palasdinawa.