Syria: Sojojin Amurka 4 Sun Halaka A manbij

Sojojin kasar Amurka 4 ne suka halaka a yau a garin manbij na kasar Syria, yayin da wasu uku suka samu munanan raunuka, bayan wani harin bam da aka kai musu.

Rahotanni daga kasar ta Syria sun cewa, sojojin na Amurka suna sintiri ne a cikin garin na Manbiji da ke kusa da iyaka da Turkiya, a lokacin da wani bam ta tashi da su, harin ya yi sanadiyyar mutuwar mutane 15 tare da jikkatar wasu da dama, hudu daga cikin wadanda suka rasa rayukansu sojojin Amurka ne.

Garin na Manbij wanda yake a hannun mayakan Kurdawa da Amurka take marawa baya, yana daya daga cikin biranen da Amurka ta girke sojojinta a kasar ta Syria.

Amurka dai tana da'awar cewa tana taimaka ma mayakan kurdawa ne domin yin yaki da kungiyar Daesh, duk kuwa da cewa gwamnatin Syria ta sha karyata hakan, inda take bayyana shigar Amurka a kasar da cewa ya sabawa kaida da doka ta kasa da kasa.