Trump Zai gana Da Jae-in Gabanin Ganawa Da Kim

Shugaban Amurka Donald Trump, zai karbi bakuncin takwaransa na Koriya ta kudu Moon Jae-in a ranar 22 ga wannan watan, gabanin ganawar da aka shirya yi tsakaninsa da Shugaban Koriya ta arewa kim Jong Un.

Sanarwar da Fadar White House ta fitar ta ruwaito cewa, shugabannin biyu wato Trump da Moon, za su tattauna ne kan ganawar dake tafe tsakanin Shugaban Amurkar da na Koriyar ta arewar.

Ziyarar ta Shugaba Moon, ta biyo bayan ganawarsa da shugaba Kim a ranar 27 ga watan Afrilun da ya gabata, inda shugabannin biyu suka tabbatar da burinsu na kawar da makaman nukiliya baki daya daga zirin Koriya.

Ana sa ran Donald Trump zai gana da Kim Jung Un a cikin wannan watan ko kuma farkon watan Yuni.

Kafin hakan dai Trump ya shaidawa manema labarai cewa, tuni aka sanya ranar da Amurka da Koriya ta Arewa za su tattauna a karon farko, kuma nan bada dadewa ba za a sanar.