Rasha : Janyewar Amurka Za Ta Haddasa Gasar Kera Makamai

Kasar Rasha ta sanar da cewa janyewar Amurka daga yarjejeniyar kawar da makamai masu linzami masu cin matsakaicin zango za ta haddasa gasar kera makamai.

Kakakin ma'aikatar harkokin wajen kasar Rasha Maria Zakharova ta bayyana a jiya Alhamis cewa, mai yiwuwa ne, janyewar kasar Amurka daga yarjejeniyar kawar da makami mai linzami mai cin matsakaicin zango za ta iya haddasa gasar kera makamai a tsakanin yankuna daban daban na duniya.

A ranar 20 ga wata ne, shugaban kasar Amurka Donald Trump ya sanar da cewa, kasarsa za ta janye jiki daga yarjejeniyar kawar da makami mai linzami mai cin matsakaicin zango, bisa zargin da ya yiwa kasar Rasha cewa, Rasha ta hana kasar Amurka kera sabbin makamai cikin dogon lokacin da suka gabata.