په تېرو ۲۴ ساعتونو کښې ۲۲۶ طالبان وژل شوي

دفاع وزارت په تېرو ۲۴ ساعتونو کښې د افغان سرتېرو په زمکنیو او هوائي بریدونو کښې د ګڼ شمېر وسله والو طالبانو د وژل کېدو خبر ورکړ.

له دغه وزارت څخه په نننۍ خپره شوې خبرپاڼه کښې راغلي چې په تېرو ۲۴ ساعتونو کې ۲۲۶ وسله وال طالبان وژل شوي او ۱۳۵ نور ټپیان شوي دي.

همدارنګه ۱۵ ماینونه هم کشف او له منځه وړل شوي دي.

وسله والو طالبانو ته دغه مرګ ژوبله د هېواد په کونړ، پکتیا، میدان وردګ، کندهار، هرات، جوزجان، هلمند، بغلان، او کابل ولایتونو کښې اوښتې ده.

طالب ډلې تر اوسه په دې اړه څه نه دي ويلي.