په کابل کې چاودنه؛ دوه کسان مړه او ۱۴ نور ټپیان شوي

د کابل په لوېدیځ کې پرون ماښام د شپې شاوخوا ۶:۲۰ دقیقې د چاودنې له رامنځته کېدو وروسته، د کابل د امنیې قوماندانۍ ویاند خالد ځدراڼ ویلي چې په دې پېښه کې دوه کسان وژل شوي او ۱۴ نور ټپيان دي.

ځدراڼ زیاته کړې چې چاودنه د کابل د شپږمې امنیتي حوزې اړوند د دشت برچي په سیمه کې پر یو کاسټر ډوله موټر شوې ده.

نوموړي ویلي چې د پېښې ټپيان روغتون ته وړل شوي دي.

د سرچینو په خبره، سیمه کې د اطفایې او امبولانسونو غږونه هم اورېدل کېږي.

خالد ځدراڼ د چاودنې څرنګوالی نه دی ښودلی او تر اوسه لا د پېښې پړه هم چا منلې نه ده.

دا په داسې حال کې ده چې د روان کال په لړم میاشتې کې د دشت برچي سیمې اړوند د نانوايي په تمځای کې د «ملت» په نوم یو ورزشي لوبغالي کې هم چاودنه شوې وه.