طالبان دې جنګ پریږدي او د سولې خبرو ته دې کښیني
د افغانستان د حزب اسلامي مشر له طالبانو وغوښتل چې په دغه هیواد کښې د جنګ په بندولو سره د سولې خبرواترو ته کښیني.
ګلبدین حکمتیار د لغمان ولایت په مرکز مهترلام ښار کښې د افغانستان له حکومت سره د سولې د موافقې له لاسلیکولو وروسته په وړومبۍ خبري غونډه کښې په دغه هیواد کښې د جنګ او تشدد د بندیدو غوښتنه وکړه.
حکمتیار وویل: له طالبانو ډلې غواړم چې له مونږ سره یوځاې شي او دا جنګ چې وړومبنی قرباني یې افغانان دي، ختم کړي.
د افغانستان د حزب اسلامي مشر طالبانو ته په خطاب کښې زیاته کړه چې له جهالت او غروره په لاس اخیستو سره د نورو قومونو ترڅنګ یو نوی څپرکی پيل کړي.
حکمتیار په خپله وینا کښې طالبانو ته د ورور خطاب ورکړ او ورڅخه یې وغوښتل چې د افغانستان د امنیت په تامینولو او پرمختګ کښې د دې هیواد دخلکو مرسته وکړي.
د حزب اسلامي مشر پر جوماتونو او ښوونځیو بریدونه وغندل او ویې ویل چې پر دغو ځایونو حملې د زغملو نه دي.
هغه همداشان وویل چې د افغانستان ګاونډي هیوادونه دې دا هیواد د خپلو سیالیو ډګر نه ګرځوي نور هیوادونه دې هم خپلې وسلې په افغانستان کښې نه ازمايي.
د افغانستان د حزب اسلامي مشر زیاته کړه: افغانستان په اوسنیو حالاتو کښې یو پیاوړي مرکزي حکومت ته ضرورت لري او په دې لړ کښې د خلکو د انتخاب احترام کوي.
حکمتیار چې ټاکل شوې سبا کابل ته لاړ شي، د ۲۰۱۶ کال په ستمبر میاشت کښې یې د افغانستان له حکومت سره د سولې هغه موافقه لاسلیک کړه چې هیواد ته د هغه د امنې ستنیدنې او د خپلوانو په شمول یې د ده د بخښنې ضمانت ورکړ.
