ایران د هند او پاکستان ترمنځ د سولې منځګړی؛
بقايي: د صهیونیسټانو حضور د هر هېواد لپاره بدبختي ده
پارس ټوډې - د ایران د بهرنیو چارو وزارت ویاند وویل: زموږ لپاره د امریکا د مذاکراتي ټیم رسمي دریځ مهم دی، او دا چې څه ډول په خپلو کې د معقولو دریځونو غوره کولو لپاره دا همغږي رامنځته کړي، د دوی پورې اړه لري.
د ایران د بهرنیو چارو وزارت ویاند اسماعیل بقايي د دوشنبې په ورځ په یوه خبري غونډه کې، پاکستان ته د ایران د اسلامي جمهوریت د بهرنیو چارو وزیر سید عباس عراقچي سفر ته په اشارې سره وویل: ایران له پاکستان سره نږدې اړیکې لري او پاکستان ته د ایران د بهرنیو چارو د وزیر سفر له ګاونډیو هېوادونو سره د ایران د دوامداره او نږدې سلا مشورو په چوکاټ کې دی.
د پارس ټوډې د راپور له مخې، بقايي وویل: سیمه ایزې مسلې، په ځانګړې توګه هغه مسائل چې اشغال شوي فلسطین، لبنان، سوریې پورې اړه لري، او هغه مسلې چې موږ په لوېدیځه آسیا کې ورسره مخ یو، له خپل سیال سره د عراقچي د خبرو اترو په اجنډا کې به وي.
د ایران د بهرنیو چارو وزارت ویاند همدارنګه، د عراقچي د هند سفر ته په اشارې سره زیاته کړه: هند ته د عراقچي سفر به د ګډ اقتصادي کمیسیون په غونډه کې د ګډون لپاره پلان شي او په څو ورځو کې به ترسره شي. د عراقچي سفر پاکستان ته د دوشنبې په ورځ پای ته رسېږي، او ټاکل شوې ده چې هغه د پنجشنبې په ورځ هند ته سفر وکړي.
د ایران د بهرنیو چارو وزارت ویاند د آذربایجان جمهوریت ته د نتانیاهو د سفر لغوه کېدو ته په اشارې سره وویل: هر هېواد ته د صهیونیسټي چارواکو سفر یقینا نامناسب او نامبارک دی.دا رژیم د فلسطین پر وړاندې د ډېرو جدي جنایتونو د ترسره کولو له امله غندل شوی دی، او د نړۍ ټول خلک د دې جرمونو له امله غمجن دي. موږ هم رسنۍ تعقیب کړې او ډاډه یو چې ټول هېوادونه به د دې په اړه محتاط وي چې د کوم چارواکي کوربه توب وکړي. ټوله نړۍ باید په دې برخه کې په ګډه عمل وکړي او د جرمونو د عادي کېدو مخه ونیسي.
