د ایران او پاکستان ولسمشرانو د شنګهاي غونډې ترڅنګ ملاقات وکړ
د ایران او پاکستان د اسلامي جمهوریتونو ولسمشرانو نن په چین کښې د شنګهايي د ملګرتیا سازمان د اتلسمې غونډې ترڅنګ په خپلو کښې ملاقات او خبرې اترې وکړې.
د ایرنا د خبر له مخې د اسلامي ایران ولسمشر حسن روحاني او د پاکستان ولسمشر ممنون حسین په دغه کتنه کښې د سیاسي او اقتصادي اړیکو په پراختیا او پياوړتیا ټینګار وکړ او د دواړو لورو د علاقې وړ موضوعاتو په باب یې د نظر تبادله وکړه.
د ایران د اسلامي جمهوریت ولسمشر حسن ورحاني د شنګهايي د ملګرتیا سازمان په اتلسمه غونډه کښې د ګډون او وینا لپاره د چین د ولسمشر شي جین پينګ په بلنه پرون دغه هیواد ته تللی دی.
په دغه غونډه کښې چې نن او سبا د چین په جینګ داؤ ښار کښې ترسره کیږي، د اتو غړو او څلورو څارونکو هیوادونو مشران او همداشان د نړیوالو سازمانونو مسئولان شتون لري.
د سیمې امنیت او ثبات، له ترهګرۍ سره مبارزه، بیلتون غوښتنه او افراط پالنه او همداشان د ملګرتیاؤ پراختیا د شنګهايي د ملګرتیا سازمان په سرمشریزه کښې د خبرواترو موضوعات دي.
