پاکستان کې د اورلګېدنې له امله ۱۰ تنه مړه شوي دي

پاکستاني رسنیو راپور ورکړی چې د دغه هېواد په شمال لوېديځ کې په یوه کور کې د اورلګېدنې له امله ۱۰ کسان مړه شوي او درې تنه نور ټپیان دي.

د پاکستان ډان ورځپاڼې راپور ورکړی چې دغه اورلګېدنه پرون سهار د خيبر پښتونخوا صوبې په کوهستان ولسوالۍ کې رامنځته شوې، چې له امله يې لس کسان مړه او درې نور ټپیان شوي دي.

د ورځپاڼې د راپور له مخې، د یادې پېښې ټول قربانیان د یوې کورنۍ غړي دي، چې ښځي او ماشومان هم پکې شامل دي.

ځايي چارواکو ویلي چې یاده اورلګېدنه د برېښنا شارټۍ له امله رامنځته شوې ده.