سوریې د اروپايي اتحایې نوي بندیزونه وغندل

دمشق د سوریې خلاف د نویو یواړخیزو بندیزونو د لګولو لپاره د اروپايي اتحادیې فیصله وغندله او هغه یې د غلیمانه سیاست او د دغه هیواد خلاف د جنګ په لړ کښې وبلله

د اروپايي اتحادیې د خارجه وزیرانو شورا تیره دوشنبه د سوریې ۸ ارګانونه او ۲۵ شخصیتونه او سوریې خلاف د اروپايي اتحادیې د بندیزونوپه لسټ کښې ورزیات کړل.

د سوریې خارجه وزارت پرون وویل چې اروپايي اتحادیه یوځل بیا خپل دروغ تکراروي او مدعي ده چې په سوریې باندې تپل شوي بندیزونه د انساني مرستو او خوراکي موادو او طبي تجهیزاتو د ورسیدو مخه نه نیسي حال دا چې دغه بندیزونه د سوریې د خلکو د ژوند او معیشت لپاره جدي خنډونه دي او د دې هیواد پر اقتصاد هم منفي اغیزې کوي.

نن سبا د سوریې په حکومت پورې اړونده ۳۵۱ کسان او ۹۰ ارګانونه د چټي تورونو په بنیاد د اروپايي اتحادیې د بندیزونو په لسټ کښې موجود دي.