د یمن له جګړې د امریکا شاتګ؛ د یمني مقاومت پایله!

پارس‌ ټودي - د انصارالله ویاند او د یمن د خبرو اترو د پلاوي مشر محمد عبدالسلام وویل، یمن به د اوربند تړون سره، سره غزه یوازې پرې نږدي او دا امریکا وه چې د اوربند غوښتنه یې کړې.

هغه په دې اړه وویل: « زموږ اوسنی دریځ زموږ د قوت او ټینګښت ښودنه کوي. د دې اوربند غوښتنه د امریکا له خوا د عمان په منځګړیتوب موږ ته رارسېدلې ده.»

عبدالسلام زیاته کړه: «اسرائیل د امریکا له دریځ څخه سخت مایوسه دی، ځکه چې امریکا هڅه کړې چې ځان د یمن له کنځې څخه وژغوري.»

هغه د ملکي تاسیساتو لکه د سمنټو فابریکو، برېښنا فابریکو، اوبو سرچینو او هوايي ډګرونو په نښه کول د دښمن د ښکاره ماتې نښه وبلله او ټینګار یې وکړ: «د ملکي وګړو او عامه تاسیساتو په نښه کول یوه ښکاره ماتې ده او دا زموږ د غزې ملاتړ مخه نشي نیولی.»

متحده ایالاتو په یوه ښکاره او ناڅاپي بدلون کې اعلان وکړ چې په یمن کې یې اوربند کړی دی.

د سي اېن اېن شبکې د یوه امریکايي پوځي چارواکي په حواله راپور ورکړ چې د دوشنبې په شپه د دې هېواد پوځ ته امر شوی چې پر حوثیانو بریدونه ودروي.

دا پرېکړه وروسته له هغې وشوه چې د امریکا ولسمشر ډونالډ ټرمپ د یمن پر ضد د بریدونو د درولو اعلان وکړ. ټرمپ په سپینه ماڼۍ کې په خبرو کې خپل د بهرنیو چارو وزیر مارکو روبیو او ملي امنیت سلاکار ته امر وکړ چې «ټول له دې تړون څخه خبر کړي».

روبیو دا تفاهم «یو مهم پرمختګ» وباله.

سي اېن اېن لیکلي: باخبره سرچینو ویلي چې د ولسمشر د ځانګړي استازي سټیو ویټکاف، چې د ایران سره د خبرو اترو مسوولیت لري، تېره اوونۍ د حوثیانو سره د اوربند لپاره هڅې کړې دي.

دا اقدام د متحده ایالاتو او ایران ترمنځ د اټومي تړون په اړه د پراخو خبرو اترو په لور یو ګام بلل کېږي.

امریکا د ۲۰۲۵ کال د مارچ له ۱۵مې نېټې راهیسې پر یمن پراخه هوايي بریدونه پیل کړل چې د ډونالډ ټرمپ له بیا واک ته رسېدو وروسته په لویدیځه اسیا کې د واشنګټن تر ټولو مهمه پوځي عملیات بلل کېږي.

ټرمپ د دې نېټې په صادرولو سره د هغو بریدونو د اجرا اجازې ورکړې چې د اوونیو لپاره یې پلان جوړ شوی و.  په دې بریدونو کې د یمن بېلابېلې سیمې سلګونه ځله بمبار شوې.

پېنټاګون ادعا کوي چې په یمن کې یې د بېلابېلو موخو پر ضد له زرو څخه زیات بریدونه کړي دي. په دې عملیاتو کې، امریکا د «هری ترومن» او «کارل وینسون» الوتکې وړونکو بېړیو او همدارنګه د B-2 سټراټېژیکو بم غورځوونکو الوتکو څخه کار اخیستی چې د GBU-57 سنګر ماتوونکو بمونو سره سمبال وو او شاوخوا ۱۴ ټنه وزن یې درلود.

داسې ښکاري چې د امریکا له خوا د اوربند اعلان د پېنټاګون د ناتوانۍ له امله دی چې د یمن مقاومت وځپي او د یمنیانو لخوا پر اشغال شوې فلسطیني خاورې د توغندیو بریدونو دوام، د دې جګړې د زیانونو زیاتوالي سره یوځای، د واشنګټن لپاره لامل شوی دی.

د امریکا د پراخو پوځي عملیاتو له پیل یوه نیم میاشت وروسته، د دې هېواد رسنیو د ټرمپ د حکومت د موخو په ترلاسه کولو کې د ناکامۍ اعتراف کړی دی.

سي اېن اېن په دې اړه لیکلي: د حوثیانو پر ضد د امریکا د بریدونو درول په داسې حال کې شوي چې دا کمپاین له پیل څخه له ستونزو سره مخ و.

د باخبره سرچینو په وینا، د انصارالله ځواکونو یوازې په اوو اوونیو کې لږ تر لږه اووه د امریکا څو میلیونه ډالري بې پیلوټه الوتکې را وغورځولې؛ هغه موضوع چې د واشنګټن وړتیا یې د عملیاتو «دوهم پړاو» ته د ننوتلو لپاره ګډوډه کړې ده.

همدارنګه، د فارن پالیسي مجلې د اپریل په ۲۲مه په یوه مقاله کې چې سرلیک یې و «د ټرمپ جګړه د حوثیانو پر ضد هیڅ پایله نه لري»، د متحده ایالاتو د سمندري ځواکونو لخوا د انصارالله پر پوستونو د بریدونو بې پایلې ته په اشارې سره لیکلي: د ټرمپ لخوا پر یمن د بریدونو له تېزېدو پنځه اوونۍ وروسته، څو لویې ستونزې څرګندې شوې چې ښيي د متحده ایالاتو ولسمشر په سختۍ سره خپلې ادعاوې په عملي پایلو بدلولی شي.

دې مجلې زیاته کړه: د امریکا عملیات په خپلو دوو اصلي موخو — یعنې د سرې بحیرې په سمندري لارو کې د امنیت تضمین او مخنیوی — کې ناکام شوي دي.

د سرې بحیرې او سوېز کانال کې د کښتیو تګ راتګ حجم، د امریکا لپاره د یو میلیارد ډالرو څخه زیاتو لګښتونو باوجود، لا هم کم دی. په مقابل کې، یمني ځواکونو ټرمپ ته د «یمن کنځې» ته د ننوتلو په اړه خبرداری ورکړی او پر اسرائیلو او د امریکا پر جنګي کښتیو یې خپل بریدونه تېز کړي دي.

په حقیقت کې، امریکا په خپلو پوځي محاسبو کې یو کلیدي عامل له پامه غورځولی: د یمني جنګیالیو مسلکیتوب او د سعودي ایتلاف سره د کلونو جګړې تجربه. لویدیځو رسنیو د یمنیانو په اړه ناسم انځور وړاندې کړی و چې ګواکې دا خلک بدوي دي او نظامي جوړښت نه لري، خو د وروستیو عملیاتو پایلو د دې ادعا پرخلاف ثابته کړې ده.

 د یمن مقاومت لخوا د ۲۷ MQ-9 ریپر بې پیلوټه الوتکو را وغورځوله — چې امریکا ته یې له ۸۰۰ میلیونو ډالرو څخه زیات زیان اړولی — ښيي چې یمنیان نه یوازې د نه منلو وړ زړورتیا لري، بلکې د تخنیکي پوهې، پرمختللو مهارتونو او د دښمن د وهلو لپاره اړینو تجهیزاتو خاوندان دي.

د امریکا د هوايي بریدونو ناکارتوب د یمن د پوځي وړتیاوو په کنټرولولو کې، د درنو زیانونو او پر اسرائیلو د یمن د توغندیو بریدونو دوام سره یوځای، په پایله کې ټرمپ اړ کړ چې له خپلو پخوانیو دریځونو شاتګ وکړي او د اوربند غوښتنه وکړي — په داسې حال کې چې مخکې یې ادعا کوله چې یمن په ګونډو کړی شي.