کومو هوايي شرکتونونیواکي سیمو ته الوتنې وځنډولې؟

پارس ټوډې - د تل ابیب په بن ګوریون هوايي ډګر باندې د یمني وسله والو ځواکونو وروستي توغندیز برید په نیواکی سیمو کې د الوتنو بحران یوې نوې مرحلې ته رسولی دی.

د یمني وسله والو ځواکونو لخوا د بن ګوریون په هوايي ډګر له  وروستي توغندیز برید وروسته، د الوتنو د ځنډولو یوې څپې د نړۍ په بیلابیلو هیوادونو کې زرګونه صیهونیسټي مسافر په بې نظمۍ کې اچولي دي. د پارس ټوډې په وینا، د جرمني، سویس، هسپانیې، ایټالیا او هند په ګډون د څو هیوادونو هوايي شرکتونو تل ابیب ته د خپلو الوتنو ځنډول غځولي دي. دا اقدام د امنیتي اندیښنو له امله شوی دی.

د جرمني د لوفتانزا هوايي شرکت ویاند په دې اړه اعلان وکړ چې د امنیتي دلایلو له امله او تر بلې خبرتیا پورې به صیهونیسټ رژیم  ته د شرکت الوتنې نه ترسره کیږي. سویس ایر او ایر انډیا هم ورته پریکړه وکړه. د دې شرکتونو رسمي سرچینو ټینګار کړی چې د مسافرینو او د الوتکې د عملې خوندیتوب لومړیتوب لري، او د الوتنو هر ډول بیا پیل به د راتلونکي امنیتي شرایطو ارزونې پورې اړه ولري.

د ایټالیا هوايي شرکت ITA هم د شنبې په ورځ اعلان وکړ چې د می تر ۱۹مې پورې به نیواکی سیمو ته خپلې ټولې الوتنې وځنډوي.

د صهیونیسټی  ورځپاڼې "ډیمارکر" د ننی  راپور له مخې، د هغو هوايي شرکتونو شمیر چې د یمن د توغندیو د برید له امله یې اشغال شویو سیمو ته خپلې الوتنې لغوه کړې دي، ۱۹ شرکتونو ته رسیدلی دی.

شنونکي په دې باور دي چې د دې بهیر  دوام کولی شي د اسراییلو لپاره د پام وړ اقتصادي او سیاسي اغیزې ولري، په ځانګړې توګه د هوایی ترانسپورت او ګرځندوی په برخو کې. په ورته وخت کې، اسراییلي چارواکو هم اعلان کړی چې د هیواد په هوايي ډګرونو کې یې امنیتي تدابیر زیات کړي دي.

د صهیونیسټ شرکت سیګنل اجرایی رییس په دې وروستیو کې د یمني پوځ لخوا د توغندیو د برید له امله د بن ګوریون هوایی ډګر ته د یو شمیر بهرنیو شرکتونو د الوتنو د ځنډولو وروسته وویل: "موږ هیله لرو چې هوایی شرکتونه به نور اسراییلو (اشغال شویو سیمو) ته خپلې الوتنې وځنډوي، ځکه چې دا به موږ ته لوی زیان ورسوي او د بیو د زیاتوالي لامل به شي."

په یمن کې د بشري عملیاتو د همغږۍ مرکز اعلان وکړ چې دوی د ملکي هوايي چلند نړیوال سازمان او د هوايي ترانسپورت ټولنې ته خبر ورکړی چې د اسراییلو دښمن هوايي ډګرونه په دوامداره توګه د یمني وسله والو ځواکونو لخوا تر برید لاندې دي، نو دوی باید د اړوندو خواوو (ATS) سره همغږي وکړي.

په دې وروستیو میاشتو کې، د یمن پوځ په غزه کې د مظلومو فلسطینیانو د مقاومت په ملاتړ کې د اسراییلو پر پوځي اهدافو بریدونه کړي دي، په داسې حال کې چې د صهیونیسټ رژیم سمندري محاصره یې هم کړې ده.

د یمن پوځي ځواکونو ژمنه کړې چې د اسراییلو تر اشغال لاندې سیمو باندې به محاصره او بریدونه تر هغه وخته پورې دوام ورکړي تر څو چې صهیونیسټ رژیم په غزه خپل بریدونه ودروي.