Sionistët: Nuk kemi informacione për të vrarë Nasrullahun
Regjimi sionist, i cili prej vitesh ka spiunuar dhe mbledhur informacione për të gjetur qoftë edhe një të dhënë rreth vendndodhjes së Sekretarit të Përgjithshëm të Hezbollahut libanez, Sejid Hasan Nasrullah, pranon se e ka humbur mundësinë e vetme për ta vrarë atë.
Sipas raportit të rrjetit mediatik Al-Alam, "pavarësisht përpjekjeve të vazhdueshme të inteligjencës që synojnë eliminimin e [Sejid Hasan] Nasrullahut, nuk ka asnjë informacion rreth tij [për vrasjen e tij]".
Kjo është një pjesë e raportimit të sotëm të faqes së lajmeve "Ynet" të regjimit sionist, duke cituar deklaratat e zyrtarëve të informuar të këtij regjimi.
Sipas gazetës "Ra'i al-Yaum", makina e propagandës izraelite vazhdon përpjekjet e saj të pandërprera kundër Sekretarit të Përgjithshëm të Hezbollahut të Libanit, Sejid Hasan Nasrullah dhe vazhdojnë ta prezantojnë atë si "personin më të rrezikshëm" për ekzistencën e regjimit pushtues, i cili kërkon të përshkallëzojë tensionet dhe të përballet me këtë regjim në mënyrë gjithëpërfshirëse.
Gjenerali rezervist Ronen Cohen, i cili shërbeu si zëvendëskomandant i Njësisë së Hetimit në Departamentin e Inteligjencës Ushtarake të ushtrisë sioniste, konfirmoi dështimin e Tel Avivit për të vrarë Sekretarin e Përgjithshëm të Hezbollahut, duke pretenduar se e vetmja mundësi e dhënë gjatë viteve të fundit për të vrarë Nasrullahun ishte gjatë një konference të tij për shtyp në vitin 2006, pas zënies rob të disa ushtarëve izraelitë dhe pak para Luftës së Dytë të Libanit.
Ai shpjegoi se pasi Hezbollahu zuri rob dy ushtarë izraelitë, një atmosferë konfuzioni dhe kaosi mbretëroi në kabinetin qeveritar izraelit, në ushtrinë dhe në aparatin e inteligjencës, dhe liderët folën vetëm për "këtë pengmarrje" pa përmendur hakmarrjen dhe vrasjen e Nasrullahut. Dhe kjo ishte pikërisht mënyra se si Izraeli "e humbi mundësinë për të eliminuar liderin e organizatës më të rrezikshme terroriste". Atentatet terroriste nuk ishin në agjendën e Izraelit në atë kohë dhe "në një mënyrë të çuditshme" u vendos që Nasrullah të eliminohej përmes luftës.
Duke justifikuar dështimin e aparatit të inteligjencës izraelite për të mbledhur informacione të sakta për të vrarë Sekretarin e Përgjithshëm të Hezbollahut libanez, ky gjeneral izraelit tha se prioriteti i Izraelit në atë kohë ishte të parandalonte ndezjen e frontit verior dhe të stabilizonte situatën përgjatë kufirit me Libanin pas tërheqjes në vitin 2000.
"Ynet" citoi burime sigurie dhe shkroi se që nga fshehja e Nasrullahut në nëntokë, Izraeli shpenzoi shumë para dhe përpjekje për të marrë informacion rreth vendndodhjes së Nasrullahut, por deri në këtë moment nuk ka arritur ta gjejë vendndodhjen e Sekretarit të Përgjithshëm të Hezbollahut të Libanit.
Megjithatë, gjeneral-majori në pension Gershon Hacohen thotë se nuk është larg mendjes që Izraeli të dëshirojë të vrasë papritur Nasrullahun, por rezultati do të ishte fillimi i një lufte.
Porse Tel Avivi duhet ta dijë se eliminimi i Nasrullahut nuk do të thotë eliminim i Hezbollahut dhe se kjo organizatë ka udhëheqës dhe komandantë me përvojë të lartë në fushën e politikës dhe të sigurisë.
