Mali kuwaingiza jeshini wapiganaji 2,000 wa makundi yenye silaha

Serikali ya Mali imetangaza kuwa itaanza kuwajumuisha wapiganaji 2,000 kutoka makundi washirika yenye silaha katika jeshi na vikosi vya usalama, kwa lengo la kujenga amani na harakati mbalimbali ambazo zimekuwa zikipigana dhidi ya serikali.

Mpango huo utajumuisha harakati ambazo hivi karibuni zilitangaza utiifu wao kwa jeshi la Mali na kupigana katika safu zake, kama vile "Makundi ya Kujilinda", wanamgambo wa "Dan Na Ambassagou" na wanamgambo wa "mghad Tuareg" wanaoshirikiana na gavana wa eneo la Kidal, Jenerali El Hadj Ag Gamou.

Waziri wa Maridhiano ya Kitaifa, Jenerali Ismael Wagué, amesema kuwa ushirikiano wa wapiganaji hao ni mwanzo wa kujenga hali ya kuaminiana ya kudumu kati ya washikadau wote wanaotaka kuendeleza maridhiano ya dhati na ya kudumu.

Waziri huyo amesema kuwa kufanya kazi ili kufikia maridhiano na makundi yaliyokubali kuungana na serikali na kupigana katika safu zake ni matokeo ya mazungumzo ya kitaifa ambayo yaliandaliwa mwaka jana.

Baraza tawala la kijeshi la Mali lilijiondoa kwenye "Mkataba wa Amani na Maridhiano" uliotiwa saini nchini Algeria mwaka 2015, na kuandaa mazungumzo ya kitaifa mwezi Mei 2024, ambapo lilitangaza kuwa tayari kufanya mazungumzo na makundi yenye silaha ambayo yangekubali kupokonywa silaha na kujiunga na jeshi.

Waziri huyo amesema katika awamu ya kwanza, wapiganaji elfu mbili wataunganishwa katika jeshi la taifa, na wapiganaji elfu moja ambao hawawezi tena kufanya kazi kulingana na mfumo wa vikosi vya jeshi, watatunzwa na serikali.