Rais Pezeshkian asisitizia haja ya kuimarisha uhusiano wa Iran na Madagascar

Rais Masoud Pezeshkian amewataka mabalozi wapya walioteuliwa hivi karibuni kuiwakilisha Jamhuri ya Kiislamu katika nchi za Madagascar na Croatia kuimarisha uhusiano wa pande mbili baina ya Iran na nchi hizi mbili.

Katika mkutano na Amir-Hossein Gharibnejad na Sabzeali jana Alkhamisi, Rais Pezeshkian aliwatakia kheri na mafanikio wanadiplomasia hao wa Iran, wanapotekeleza majukumu yao katika nchi mbili hizo.

Amesisitiza umuhimu wa kuendeleza uhusiano kati ya Iran na nchi hizo mbili, kwa kuzingatia sera ya msingi ya serikali yake, ambayo ni kukuza uhusiano wa kirafiki na kupanua ushirikiano na nchi nyingine.

Kadhalika Rais wa Iran ameangazia fursa zenye kutia moyo za ushirikiano katika bara zima la Afrika. Rais Masoud Pezeshkian wa Iran amezungumzia uwezo wa bara la Afrika na ulazima wa kuwepo ushirikiano na kubainisha kwamba, Iran iko tayari kupanua ushirikiano wake na bara la Afrika katika nyanja zote.

Katika mkutano huo wa jana Alkhamisi hapa mjini Tehran, mabalozi hao walieleza mipango yao ya kuimarisha uhusiano baina ya pande mbili kwa kutumia fursa na uwezo uliopo.

Katika miaka ya karibuni, Iran imeratibu mipango ya kuimarisha ushirikiano na nchi mbali mbali duniani, zikiwemo za bara Afrika, kwa kuzingatia uwezo wake wa kiuchumi na ule wa nchi za Kiafrika.

Vikao vya pande mbili na viongozi wa Kiafrika na maonyesho mbalimbali ni miongoni mwa hatua zilizochukuliwa na pande mbili kwa shabaha ya kuimarisha ushirikiano kati ya Iran na nchi za Kiafrika.