Əmir Əbdullahiyan:Avropə bəştə ehdəmonon əməlış kardəni
İron İslom Respublikə xarici koon vəzir çe Avropə bəştə ehdəmonon əməl nıkardeyış de zəmoni bıə hənəkış zıne.
Avropə İttifoği xarici siyosəti rəsmi şəxs "Cozef Burrell" se qılə Avropə kişfər bıə,İngiliston,Fransə və Almaniyə de qıləy məktubi bə İroni zidd rəket sanksiyəon ləğv nıkardeyışon votə.
İroni xarici koon vəzir Huseyn Əmir Əbdullahiyan zinə ruji (cımə) Ğurbətədə bıə mıcohidon iclos bə oxo rəsey bədiqə bə IRNA mısohibədə votəşe: " se qılə Avropə kişfər de duyə təzyiğon vardey bənav viteyışon piyedə.
Ğərol be ki,Trampi çe AMFP-ku xaric bıey bədiqə, bəpe avropəvıjon ıştə ehdəmononədə mandənin bin,lakin əvon de zəmoni bıə hənəkış karde və bəştə ehdəmonon səmt bo qıləy qəm nışodoey xoto,ımışon qıləy amil kardeşone.
İroni xarici koon vəzir bəzi şəxson nomon bə sanksiya siyohi dənoey əloğədor votəşe: əmə çe əks tərəfon hərəkəton becəvob nibəhaştemon.əvon i tərəfiku de votemonon tələb kardey və digər tərəfiku ıştə səhfə siyosəton təkror və dəvom doə holədə bə İroni zidd təzyiğon ziyod kardey əzınin.
Huseyn Əmir Əbdullahiyan həmçinin votəşe:İroni de Agentəti həmkoəti çok-çoki inkişof kardedə və çəmə de çın təşkiloti sər katib “Rafael Qrossi” nezə rabitəmon heste və İroni Atom Enerji Təşkilotı de Beynəlxalğə Atom Enerji Agentəti rəsmiyon nezə dəvardə manqonədə dı tərəfi miyono həmkoəti sahədə çokə inkişofon bədast vardəşone.
İron İslom Respublikə bəştə ehdəmonon əməl kardeyədə sadığ tərəf bıey təkid kardə xarici koon vəziri votəşe:bə AMFP-i mətni əsos,əks tərəfon çanədə ıştə ehdəmonon darışton və çəyku bə diyəro bımandon,İron həm çe AMFP-i çərçivədə ıştə tədbiron bəvinde.
Əmir Əbdullahiyan əlovəş kardə:bın nəzəku,İron İslom Respublikə Hukuməti İslomi Şurə tərəfiku təsdığ kardə bıə AMFP-i bə həyot dəvordıneyədə mıtənosib və dı tərəfinə fəoliyyət ğanun,çın məsələ vəzifə mıəyyən kardedə və hukumət bın çərçivədə mıvofiğ və mıtənosib qəmon peqəteydə”.
Xarici koon vəzir təkror iyən betəsirə sanksiyəon bə İron İslom Respublikə irodə və səyon hiç qıləy təsiri nıbey təkid kardə holədə votəşe:ım sanksiyəon çe Amerkə ıştə ziyodə tələbəti bə oxo nırosney nışon doydə.
Əmə dırıstə cəhətədə hərəkət kardey məsləhət vindedəmon.
