Mayakan Al-shabab Sun Yiwa Mutane 4 Yankan Rago A Kenya.

Mayakan kungiyar Al- shabab sun kai wasu tagwayen hare-hare a wasu kauyukan yankin Lamu County na kasar Kenya tare da yiwa mutane 4 na cikin kauyen yankan rago

Kamfanin dillancin labaran Reuteus daga Mumbasa ya nakalto Gilbert Kitty daya daga cikin magabatan tsaron yankin Lamu County na kudu maso gabashin kenya a jiya laraba na cewa mayakan kungiyar ta'addancin nan ta As shabab ta kai wani hari a kauyukan Silisni-Mashambani da Bobo na kudu maso gabashin kasar.

A watan Augustan da ya gabata ma, mayakan kungiyar Al- shabab din sun yiwa mutane 4 yankan rago a wani hari da suka kai kauyukan na yankin, a watan yulin da ya gabata ma mayakan na As shabab sun hallaka mutane 9 a yankin.

Tun bayan da kasar kenya ta aike da dakarunta zuwa kasar Somaliya domin yaki da kungiyar Al- shabab, arewa da wasu yankunan gabashin kasar ta kenya ke fuskanta hare-haren ta'addanci daga mayakan kungiyar Al- shabab.